Larsap General (Dr) Vijay Kumar Singh hovin Ningani khan Dawrpui Multipurpose Centre, Aizawlah State Level Ex-Servicemen Rally (ESR) hman a ni a, he hunah hian Home Minister K. Sapdanga’n a telpui.
Larsap chuan Mizoram ex-servicemen-te inthununna leh inchei felfai tak a hmu chu chhuanawm a tih thu sawiin, India ramah hetiang a la hmuh ngai loh thu a sawi a. Sipai pension tawhte chu an tawnhriat leh ram hmangaihna thinlung hmanga thalaite kawng dika kaihruai thin turin a chah a, “Sipai leh an chhungte ngaihsak hi ram pum mawhphurhna a ni,” tiin sorkar leh mipui chu ex-servicemen-te hamthatna ngaihsak zui zel turin a chah.
Home Minister K. Sapdanga pawhin ex-servicemen-te chu khawtlang leh ram tana mi hlu tak, Mizo tlawmngaihna leh inthununna entirtu ber an nih thu a sawi a. Mipui leh sipai inkarah thawhhona tha a awm zel nan ex-servicemen-te chu an pawimawh hle tih sawiin, Mizoram sorkarin an hamthatna tur a tul angin hma a la zel dawn tih sawi.
Rally-ah hian ex-servicemen leh an chhungte tan Multi Speciality Medical Camp buatsaih a ni a. Larsap hian ex-servicemen mi hmingthang thenkhat hnenah chawimawina leh tanpui ngaite hnenah chhawmdawlna a hlan nghal.