Aizawl: Delhi-a National Language Advisory Board thutkhawmah member, Dr. Kathy Rohlupuii chuan Mizorama Hindi tawng a than zel theih nan higher secondary leh primary School-ah Hindi zirtirtu lak te, Mizorama World Hindi Conference neih leh Hindi zirlai thiamte hnena lawmman pek chungchang a thlen.
Thutkhawm hi Union Rural Development Minister Shivraj Singh Chauhan-a’n a kaihruai a. Board-a India hmarchhak aiawh member awm chhun, Government Aizawl College-a Assistant Professor Dr. Kathy Rohlupuii chuan Mizoram mamawhte thlenin RMSA leh CSS hnuaiah higher secondary leh primary school-ah Hindi zirtirtu lak hi tawng hmasawn nan a pawimawh hle tih a sawi.
Dr. Kathy Rohlupuii chuan Mizoramin Hindi-a hma a sawi theih nan Hindi subject-a MA chung lam zirlaite hnena cash award pek emaw, sum leh paia tanpui theih dan ngaihtuahpui se a duh thu a sawi a. World Hindi Conference chu Mizorama neih leh India-a mi lar hrang hrangte chah chhuah a rawt tel bawk.
Heng bakah hian Mizoram tana harsatna awm thin, Hindi subject-a Ph.D ti turte tana UGC-in NET qualified kher a tih thin pawh ennawn leh turin ngenna a thlen nghal a ni.
Board Chairman, Union Minister Singh Chauhan chuan Mizoram mamawh leh hmasawnna tura rawtna thlengte chu an ngaih pawimawh thu leh an chhinchhiah vek thu a sawi a ni.