9th Inter District Wrestling Championship 2026 chu Ningani khan Mamitah tan a ni a, district hrang hrang atangin wrestler 192 an tel.
Mizoram Wrestling Association (MWA)-in a buatsaih wrestling intihsiakna ropui ber, district hrang hrang atanga wrestler-te fuankhawmna thin hi Mamit Multipurpose Hall-ah Er. H. Lalzirliana, Mamit bialtu MLA-in khuallian niin a hawng a ni.
Inter District Wrestling Championship 2026-ah hian huang (category) hrang hrangah thenin hmeichhia 30kg hnuai lam atanga 65kg chung lam leh mipa 25kg atanga 95kg chung lam inelna an nei ang.
Inelnaah hian a thlengtu, Mamit district atangin wrestler 48, Aizawl atangin 37, Serchhip atangin 32, Saitual atangin 47, Kolasib atangin 28 leh Lunglei atangin pakhat an inlan a. Ningani hian championship hi khar a ni ang.
A hawnna inkhawmah khuallian chuan infiam mite chu ruihhlo leh thatchhiatna laka tihlim turin a chah a. Tun tournament aia lian zawka tel thei tura inbuatsaih zel turin a chah.
A thlengtu bialtu MLA chuan Mamitin an intihsiakna hmun hman mek a neih theih dante sawiin infiamna lian zawk pawh thleng thei tura hmunhma an neih zel dawn thu a sawi bawk.
Hawnna inkhawm tawi hi Laltlankima, President, Mamit District Wrestling Association-in a kaihruai a. Lalrochuanga Colney, General Secretary, MWA-in report pein 9th Inter District Wrestling Championship hi district hrang hrang atanga wrestler tel an tam ber tum a nih thu a sawi a. Mamitin inelna an thlen danah lawm thu a sawi bawk.