Aizawl: Public Works Department changtu Minister Vanlalhlana chuan Lawngtlai district chhunga kawng siam that nan Rs nuai 193.43 dah a nih thu a sawi.
Assembly fur thutkhawm neih zawh takah Ningani khan PWD Minister chuan Lawngtlai khawpui chhunga kawng dinhmun chu sorkarin a hriat thu leh, thawm that hna thawh tum a nih thu a sawi a. Petrol leh diesel cess atangin Mizoram sorkarin PWD hnuaiah Rs vbc 43.25 chu kawng thawm that nan a dah a, hemi atang hian Lawngtlai district-a hnathawh nan Rs nuai 193.43 dah a nih thu a sawi.
Minister Vanlalhlana chuan Mizoram chhunga kawng thlan bik 19-te chu fur ruahtui tam a reh veleh siam tan nghal a nih tur thu a sawi a. A kaihhruai department-in Mizoram district khawpui hrang hrang kawng chhia dinhmun chu chiang takin an hria a ni tiin, state capital Aizawl-ah bul an tan tawh a, a dawtah district hmun pawimawh kawngte an hmabak leh dawn tih a sawi a. Kawng tha lo zual thlan bik 19-te chu fur ruahtui tam reh hunah siam tan a nih tur thu a sawi.