Aizawl: Mizoram Legislative Assembly session-ah Chief Minister Lalduhoma chuan hla phuah thiam Rokunga phuah, ‘Ro Min Relsak Ang Che’ tih hla chu Mizoram State Song atan official resolution Ningani khan a put lut a, sawiho a nih hnuah pawm a ni.
Chief minister chuan India state 14 velin state song an lo nei tawh a, India danpui pawhin neih hi a khap lem loh thu a sawi a. National Anthem leh National Song-te nena inkalh zawnga state song neih erawh a remchang lo tih sawiin August 10, 2026 cabinet meeting-ah Mizoram-in state song neih hi a tul tiin rel a lo ni tawh a, Rokunga phuah hla hi state song atan pawm a nih thu a sawi.
He hla hian Pathian chu hnam tin chunga roreltu leh lalberte lalber a nih zia a puang chhuak a, ram leh hnam hruaia inhumhima ro relsak tura tawngtaina hla a ni a. Ram rorelnaah Pathian ram tun din a nih zel theihna tura fuihtu leh hun khirh leh harsa paltlang thei tura rinna leh chakna petu a ni tih chief minister chuan a sawi.
Official-a he hla sak a nih hunah ding chungin, kutphah ding lam lung zawna dahin, rilru tawngtaina nen sa thin turin chief minister chuan mipuite a ngen zui nghal bawk.