Evangelism lama thawhhlawk tak, Rev. PC Muanthanga (85) chu Inrinni chawhma dar 9:15 khan Ebenezer Hospital-ah a thi a. A ruang hi BCM Shalom Kohhran Biak In, Mission Vengthlangah Pathianni chhun dar 1-ah vui a ni a, vuina hun hmain chawhma dar 11-ah BCM Shalom Kohhran Hall-ah thlahna hun hman a ni.
Rev. PC Muanthanga hi BCM Pastor chawl tawh Rev. Dr. PL Lianzuala unaupa (a phirpuia) a ni a, hlaphuah thiam leh zirtirtu lar Liandala fate zinga mi a ni.
Zirna lamah St. Edmund’s College-ah B.A. Hons (English) zoin, Gauhati University-ah M.A. (English) leh Diploma in Journalism a zir chhuak a. Rawngbawlnaa a chhuah hma hian Lunglei College-ah lecturer hna kum 9 chhung a thawk a, kum 1980 khan Lunglei Journalist Association (MJA) dintute zinga mi a ni bawk.
Pathianni-a mipuiin chanchinbu chhiar tur an neih loh a vei em em avangin leh rambuai kara mipuiin chanchin tha lo hlir an dawng thin chu ngaimawhin, kum 1972 khan Lunglei atangin Pathian rawngbawlna chanchinbu, Makedonia chu bul a tan (founder editor) a. He chanchinbu hi tun thlengin Mizoram hmun hrang hrangah sem chhuah a la ni.
Makedonia chanchinbu a din hnu hian Pathian rawngbawlin a chhuak zui a, USA-a Fuller School of World Mission, Pasadena-ah M.A. in Missiology a zir chhuak a ni.
A nupui, Zothanpuii nen cancer an vei hnua an thil tawn leh Pathian rinna chungchang ziakna, ‘Nang I lo awm si’ tih lehkhabu a buatsaih bakah, lehkhabu dang pasarih a ziak bawk.