Aizawl: Hnahthial District-ah Inrinni khan DC Office leh Govt. Higher Secondary School te bultumin ‘National Sports Day 2026’ chu Hnahthial District Volleyball Court-ah hman a ni. He hun hi District Sports & Youth Officer (DSYO) leh Sub Deputy Commissioner (SDC) ni bawk, Lawrence Lalhlanthara chuan khuallian niin a hmanpui.
He infiamna runpuiah hian zirlai mipa leh hmeichhiate tan Table Tennis, Volleyball leh Insuknawrah te inelna buatsaih a ni a; hmeichhia te tan bik inkawibah hmangin inelna buatsaih a ni bawk.
Khuallian Lawrence Lalhlanthara chuan thu sawiin, mihring nunah hlawhtlinna duan lawk sa a awm loh avangin mahni thawnthu ziaktu zawng zawng pawimawh ber an nih thu a sawi a. Bul tan that a pawimawh rualin a tawp khar that a pawimawh zawk thu sawiin, lehkha zirna kawngah pawh hei hi vawng tlat turin zirlaite a chah.
Mizoten infiamna an ngainat rualin chak lawm dan an thiam loh thin thu sawiin, zuk leh hmuam leh ruihhlo nena hlawhtlinna lawm chu a puitlin theih loh avangin ruihhlo laka fihlim tura chahin, infiamnaa an tui a nih pawhin zirna thlahthlam lo turin zirlai naupangte a chah bawk.
National Sports Day hi India infiammi ropui Major Dhyan Chand-a piancham puala buatsaih thin niin, kum 2012 atang khan kum tin August 29 hian India ram pumah hman thin a ni.