Aizawl: Autonomous District Council (ADC) pathumten suma harsatna an tawh mek chhan bulpui ber chu Chief Minister Lalduhoma kaihhruai ZPM sorkarin ADC-te a duhsak loh avang leh an thutiam an hlen loh vang a ni tiin BJP Mizoram State Core Group Member K. Hrahmo, MLA in a sawi.
Thawhtannia BJP Mizoram State Office, Mipui Run, Upper Republic-a Karthar Inhlanna leh Political Session-ah K. Hrahmo chuan Mizoram mipui puitling zinga zaa 17 zet ADC area-ah an awm laiin Mizoram sorkar budget atangin zaa pali chauh pek an ni chu sorkar hmasate ang lo taka duhsak lohna tar langtu a ni, a ti a; central sorkarin Mizoram budget zaa 12.18-a a tihpun laia ADC-te a hnuaichhiah zel chu thil pawi tak a nih thu a sawi bawk.
K Hrahmo chuan State Finance Commission dik tak hman a nih loh thu sawiin, Mizoram sorkarin February 12, 2024-a Gazette Order chhuaha MDC leh Ex-MDC-te hlawh a tihpun hnuah, Revised Estimate (RE) a pe duh leh si lo chu ADC pathumte ba tam tak neihchhan a ni tiin a sawi.