Atletico Madrid striker Julian Alvarez-a chuan Arsenal zawm tumna a nei lo a, Argentina international hian Gunners manager Mikel Arteta hnenah London club pan tumna a neih loh thu a hrilh.
Kum 26 mi, Alvarez-a hian Barcelona pan a duh a; mahse, Madrid club hian an elpui club hnenah an striker kaltir an duh lo va. Club thuneitute chuan a mi mal tak pawhin an hmu tawh a, Barca hnena an hralh loh tur thu an hrilh tawh.
Atletico hian Alvarez hi hralh an duh lo ngawr ngawr a ni lo a, an elpui, Barca hnena kaltir an duh lo va. Director Mateu Alemany leh Arsenal thuneitute chu London-ah indawrin Alemany hian an striker manah pound maktaduai 128 an beisei thu thlengin a sawi.
Hetiang boruak karah hian Barcelona president Joan Laporta chuan Alvarez an la ngaihven reng thu kar hmasa khan a sawi a; mahse, Atletico chuan thuchhuah siamin, “Barcelona-a a kalna chance chu 0% a ni,” an ti a, club thuneitute an inlungrual thu an sawi tel bawk.
Arteta-a’n Alvarez a dawr zui a; mahse, amah berin pan a tum loh thu a lo hrilh a. Reporter David Ornstein-a chuan, “Arsenal pawh hian club nen inremna nei ringawt mah se, Alvarez-a duh lo chung lak luh an tum bik lo va. A thleng lo tawp ang, chu ka ti thei lo a; mahse, Gunners a pan hi ka ring lo zawk,”a ti.
Alvarez-a hian ni thum ngawt chu Atletico training a zawm lo tawh a, Inrinni zana 3-1-a Sevilla an hnehna inkhelah pawh a inlan lo.
Arsenal hian tun nipui transfer-ah Bruno Guimaraes, Ezri Konsa leh Christos Tzolis te an lakluh tawh bakah Piero Hincapie an la nghet a. Mahse, Alvarez hma hian Bradley Barcola, Morgan Rogers leh Vinicius Junior te an lo ngaihven tawh a, an chang lo vek.
Arteta team hian nizan khan league-ah inlanin an khelh hmasak bera 3-0-a Coventry City hnehtu hian Unai Emery-a enkawl, Aston Villa chu tlawh a ni.