Mizoram-a Revamped Distribution Sector Scheme (RDSS) hnuaia smart meter vuah mek chungchanga hmalakna leh harsatna awm hrang hrangte sawiho a ni a. Smart meter chungchanga mipui harsatnate rang taka ching fel turin Customer Care Centre (CCC) peih a nih thu P&E Minister F Rodingliana hoin Thawhtannia a pisa-ah department official-te nen thutkhawmah sawi a ni.
Thutkhawmah hian Central Electricity Authority (CEA) Regulation 2026 thuchhuah angin communication network awmna tawh phawtah smart meter hman ngei ngei a ngaih thu leh prepayment (prepaid) erawh mipui duh thlannaah dah a nih thu sawi a ni.
Mizorama electric consumer 3,20,000 awm mekah meter chhia leh dik tawk lo 34,300 vel a awm avangin power hloh tam tak a thleng thin a, hei hi tihhniam a nih theih nan central sorkar hmalakna zarah smart meter 82,000 vel vuah a ni tawh tih sawi a ni.
Smart meter vuah thar zingah hian zaa 24.67 vel chu a tirah bill tam deuh anga lang awm mah se a hnuah a tam chhunzawm kher lo va, bill tlem zawk pawh zaa 30.24 lai an awm ve bawk niin an sawi.
Meter chhia leh dik tawk lo a thlak tak hnu hian electric hman zat dik tak a luh theih phah a. SIM card communication fel loh avangin leh billing period/manual reading lak a sual palh avanga bill tam emaw harsatna eng emaw a awm thei a ni.
Hetiang harsatna tawkte pui tur hian CCC siam a ni a, landline number 0389-2310169/2322174, Whatsapp number 8132801559/ 6009192434 leh mahni bialtu electric department office-ah harsatnate thlen theih reng a ni.
Bill complaint a luhin a dik leh dik loh finfiah hmasa lova bill pe hmasa tura lo nawr luitu electric duty-te an awm chuan department hotute hnenah hriattir vat turin mipuite ngen an ni bawk.
Mizorama hman tur smart meter-te hi phurh chhuah a nih hmain laboratory-ah P&E department engineer-te telin a dik ngei a ni tih finfiah vek a ni a, finfiahna paltlang tawh zinga eng emaw zat chu National Accreditation Board for Testing & Calibration Laboratory-ah test nawn leh thin a ni.
Vuah hnuah pawh meter-ah manufacturing defect a lo awm a nih chuan meter number hmangin laboratory-a test dan kimchang chhui let leh vek theih a nih thu tar lan a ni bawk.