Democratic Republic of Congo (DRC)-a Ebola leng mek lai chuan a darh chak lai a tawng mek a, an rma leng tawha a nat ber tum thlengin sorkarin a chhinchhiahnaah chuan mi 6,000 chuangin an kai tawh a, mi 3,000 dawnin an thihpui tawh bawk.
Tuna leng mek, Bundibugyo chi hi a enkawlna leh a invenna damdawi hman tur pawm la awm lo a ni a, tunah hian ram chhung hmun hrang hrangah a darh mek.
UN Secretary-General Antonio Guterres-a chuan hri leng mek hi ‘Ebola leng tawhah a darh chak ber’ tia sawiin thawktuten an an umzui leh kai tharte an buaipui hmain a dangah a darh hman zel niin a sawi a. Africa Centres for Disease Control & Prevention chuan a chhan ber chu a kaite hi an hnuhma chhui hman an nih loh vang niin a sawi.
DRC communications ministry chuan hri kai 6,041 an awm tawh tih social media-ah an tar lang a, ‘enkawl dam 1,366 awmin mi 2,911-in an thihpui tawh a, damlo 619 chu dah hran leh damdawi ina awm mek an ni’ tih an sawi.
Hri hi DRC khawchhak lama mihring bitna lai hmunah a darh nasa zual a, heng lai hmun hi hel tamna a nih avanga himna tha tawk lo, buaina tlanchhiatsan tamna leh nun a changkan lohna hmun a nih avangin thawktute tan pawh chetlak a harsa em em a ni.
Damdawi thila mi tanpuitu pawl, Doctors Without Borders chuan thlawhna tumhmun khar leh thlawhna thlawh khuahkhirhna chuan damdawi leh hmanrua a thleng zung zung thei lo va, thawktute veivah a harsa a, damdawi a indaih lo va, hmun danga inenkawl tura kal vel a khirh bawk niin an sawi.
August thla tir khan damdawi ina thawk tam tak chu hlawh pek an nih loh avang leh an hnathawhna hmun him lo lutuk avangin an lo nuar tawh bawk.
An thenawm, Uganda erawh Ebola awm lohna ramah puan a ni tawh a, Zirtawpni khan ni 42 chhung hri kai thar an awm tawh loh avangin an zalen ta tih an puang a ni.