- Dr. C. Lalrampana
Sap hla ka ngaithlak ve tan tirh ata tun thlenga ka ngaihsan, khawvel pumpuia mipui pawhin an ngaihsan rawn thin zaithiam leh hla phuah thiam tak ni bawk si “Dolly Parton” fam dairial a han.chang ta mai hi kan uiin kan tuar tlang hle niin a lang. Social media platform hrang hrang a luah khat hneh hle.
Dolly Parton (80) chuan August 25, 2026 khan kum 80 mi niin thlafam dairial a chang ta. A chhungte’n a official website atanga a thih thu an puanna atanga a lan danin a hming pum hi Dolly Rebecca Parton niin a pian ni hi January 19, 1946 a ni. A pianna hmun hi Locust Ridge, Tennessee, USA a ni.
May 2026 khan kal tha lo leh autoimmune chak lohna kum 3 chhung a neih tawh niin sawi a ni a; Sept. 2025-a Las Vegas-a a show neih tura tih pawh khan medical procedure avangin a sawn tawh a. Tichuan, August 21, 2026 khan Nashville USA-ah
August 25, 2026 zanlai vel khan kum 80 mi niin a thi tih a unaunu fapa Bryan Seaver-a’n a puang a ni. A thih chhan hi “Brief battle with cancer” pãnchhe natna rang chi tih ringawt a ni a, eng cancer chiah nge tih tarlan a awm lo.
Amah hi Country zaithiam, hla phuah, lemchan, lehkhabu ziak, sumdawng, mi rethei tanpuitu ropui tak a ni. Tennessee-ah chhungkaw rethei tak, unau 12 zinga 4-na niin a lo piang a. Naupang tê a nih lai atangin rimawiah a tui nghal hle a. A pu Bill Owens-a’n rimawi lama a bul tan nan a pui nasa hle.
Rimawi lamttluang zawhin Dolly chuan The Porter Wagoner Show atangin America country music khawvelah hriat a hlawh tan a. A hnuah zaithiam, mal zai leh hla phuah thiam angin khawvel huapin a lâr chho ta a ni.
A hla lar zual deuh deuhte chu:
Jolene
I Will always Love You
9 to 5
Coat of Many Colors
Islands in the Stream-te an ni.
A bik takin “I Will always love You” tih hla hi Dolly ngeiin a phuah a ni. A hnuah Whitney Houston-i’n a sak nawn khan khawvel huapin a lâr lehzual ta a ni.
Jan 19, 2026-ah a piancham kum 80-na a lawm a. Chumi tan chuan “Light of a Clear Blue Morning” tih hla chu Lainey Wilson, Miley Cyrus, Queen Latifah, Reba McEntire-te nen a tharin a tichhuak.
Chawimawina leh Hlawhtlinna a neihte chu:
Grammy Awards vawi 10 a dawng.
Grammy nomination vawi 55 a hmu.
Country music-ah record tam tak siamtu
Rimawi mai ni lo, film, TV, Broadway leh sumdawnnaah pawh nghawng lian tak a nei. “9 to 5” film-ah a chang a, a hla pawh a sa nghal, chu chuan pop khawvelah a lârtir hle.
Emmy, Grammy, Oscar, Tony – America entertainment chawimawina lian 4-ah nomination hmu thei mi tlemte zinga mi a ni.
Dollywood-a a sumdawnna lian ber pakhat chu Dollywood theme park hi a ni. Tennessee, Pigeon Forge a awm a ni a, a khaw chhuahna bial tlawhtu hipna lian ber a ni. Zaithiam mai ni lo, sumdawng thiam tak a ni bawk. Imagination Library hi a rawngbawlna lian ber pakhat chu Dolly Parton’s Imagination Library hi a ni. Naupangte lehkha chhiar duhna tihpun nan a thlawnin lehkhabu a sem thin, a lehkhabu hian khawvel pumah naupang maktaduai tam tak hnen a thleng tawh. A dam chhungin lehkhabu maktaduai 300 chuang a sem tawh tih hriar a ni bawk. COVID-19 vaccine research atan pawh US $1 million a thawh a, chu chuan Moderna vaccine siam nan a pui nasa hle tih hriat a ni.
Inneihna: Dolly Parton hian Carl Thomas Dean chu 1966 khan pasalah a nei a. Kum 59 chhung an innei hman. Carl Dean hian March 2025 khan a thihsan a ni. Dolly chuan a pasal chu mimal nuna a duh zawg mi leh a nuna a innghahna ber a nih thu a sawi.
A Tawp berah chuan Kum 2025-26 chhung khan Dolly chuan hriselna lamah harsatna a tawk nasa tan a . Aug. 9, 2026 ah dehydration leh luhai avangin program thenkhatah a tel thei tawh lo. August 19, 2026-a ACM Honors ah Poet’s Award a dawn tum pawh khan a taka amah kal lovin virtual-in a tel a ni.
A hnu lawk August 25, 2026 khan Dolly Parton thih thu puan a ni ta phut mai le! A thihna hi Vanderbilt-Ingram Cancer Center-ah a ni a, a chhungte’n an kil bial vel lai a ni tih CBS in a tarlang.
A Pawimawh ber ber mai chu Dolly Parton hi “country singer” tih ringawt a sawifiah chi a ni lo. Hetih rual hian
Zaithiam + hla phuah + lemchang + sumdawng + mi rethei tanpuitu + naupang lehkha chhiar tihlartu a ni.
A chanchin hi Tennessee chhungkaw rethei ber atanga seilian, khawvel huapa zaithiam lar leh naupang maktaduai tel tanpuitu a lo nih theihna chanchin ropui tak hi a chhuanawm hle a ni.
Thil mak ve tak pakhat chu Dolly hian 2015 khan a thih hnua hriatrengna atan “My Place in History” tih hla la chhuah loh a lo record lawk a, chu chu kum 100 a tlin kum 2046-ah tihchhuah tum a ni tih Guinness World Records-in a ziak. Mahse, a tumna ropui tak erawh hi a ban pha ta bik lo a ni e.