Aizawl: Mualthuam North tleirawl, H. Lalramdinpuii thattua puh mi pahnih zinga pakhat, Denghmingthanga chu Lunglei Police Station (Thana) atangin a tlan chhuak.
Thudawn danin Denghmingthanga hi Thawhtanni khan thu zawh fiah turin Lunglei District Jail atangin lak chhuah a ni a. Police station atangin Thawhtanni zanlai dar 12 hnu vel khan a tlan chhuak nia hriat a ni.
He chanchin buatsaih lai thleng hian hmuh a la ni lo va, police-ten ngawrh takin an zawng mek a ni.
Denghmingthanga hi a tlan chhuah lai hian pheikhawk bun lovin kawl (handcuff) vuah chungin a tlan chhuak a, a thuamhnaw hak pawh a dum tial lam a ni.
Hetih lai hian Denghmingthanga hi Lunglei Rahsi veng khamah a zuang thla angin social media-ah a darh a, Lunglei Sub-Hqrs YMA hnuaia Disaster Response Team-in ngaihvenin khamah uai thlain an enfiah a; mahse, engmah hmuh a ni lo.
YMA Sub-Headquarters Lunglei chuan Thawhlehni khan thuchhuah siamin police-ten hmalakpui tura an ngen angin YMA Sub-Headquarters, Lunglei hnuaia branch tinte chu mahni huam chhung theuhva mit lena police-te thawhpui turin an ngen a. Denghmingthanga chin hria emaw, hmu emaw an awm a nih pawhin kut thlak lova Lunglei Police Station (Mb. No. 9485414441)-ah emaw, YMA hruaitute hnenah emaw hriattir vat turin an ngen bawk.