Aizawl: BJP Mizoram State Thalai President Robinson Malsawmtluanga Hmar leh Vice President H. Malsawmtluanga te chuan Thawhlehni khan Union Youth Affairs & Sports Minister Dr. Mansukh Mandaviya chu New Delhi-a a chenna inah an kawm a, Mizo thalaiten infiamnaah hma an sawn zawk theih nan leh infrastructure tha zawk an neih theih nana hmalakpui turin an ngen.
New Delhi-a BJP Thalai All State Office Bearers meeting-a tel Mizoram aiawhte hian 2036 Olympic-a India aiawha Mizo thalai a tam thei ang ber an tel theih nan Mizoramin sports infrastructure changtlung a mamawh thu an thlen a. A bikin national leh international level-a medal lak tamna ber pawl, Mizo boxing tihtawp lova a awm theih nan boxing hall lian leh changtlung din a nih theih nan leh boxing association harsatna chinfelsak turin an ngen bawk.
Union Minister Dr. Mandaviya chuan BJP Mizoram Thalai hruaitute nen inkawmna hun tha tak an nei chu lawmawm a tih thu sawiin, Mizo thalaite hmakhua ngaia ngenna an thlente chu theihtawp chhuahpui a tum thu a lo hrilh a ni. A bikin boxing association harsatna pawh Boxing Federation of India hruaitute a rang lama a taka hma lakpui a tum thu a sawi.
Minister chuan central sorkar chuan North East leh a bikin Mizoram thalaite chawikanna kawngah theihtawp chhuah a inhuam reng thu sawiin, Mizoram thalaite tan engtik lai pawhin kawng a inhawn reng avangin mamawh leh harsatna an neih pawhin inthlahrung lova sorkar laipui pan zel turin a chah a ni.