Non-Government Hospital Association of Mizoram (NGHAM) chuan an member-ten Mizoram Universal Health Care Scheme (MUHCS) an la zawm ve theih loh avanga damlo tam tak leh an chhungten harsatna an tuar thin chu pawi an tih thu sawiin, sorkarin phai damdawi in leh kohhran damdawi in thenkhatte rate tha pangngai tak a pek anga rate tha tak pek a nih chuan MUHCS zawm an inpeih reng thu an sawi.
NGHAM hian April 30, 2026-a sorkar thuchhuah, empanelled loh hospital-te tana emergency bill phalsak chhun — ICU-a dah nghal ngai, nunna chhanhim nana zai nghal ngai leh accident tawkte chauh empanelled loh damdawi ina bill phalsak an nih hian damlo tam tak tana harsatna a thlen thu an sawi a. BP sang lutuk, zunthlum sang, heart attack, nikhawhrelo leh naupang khawsik sang ang chi, emergency ni si, ICU awm kher ngai loten bill an hmu thei lo chu sorkar hnathawk leh MUHCS subscriber-te tana harsatna lian tak a nih thu an sawi bawk.
Mizoram-a private hospital-te hian ram chhunga entrepreneurship development leh thalai sang tel tana hna siam chungchangah thawh hlawk tak an nih thu sawiin, sorkar chu phai lam damdawi inte nen inremna an siam ang bawk hian inremna tha siampui turin an ngen a. Deemed empanelled damdawi in (Woodland Hospital, Shillong leh Silchar Cancer Institute ang chi) status-te em pawh hi MUHCS an zawm tak tak hma pawhin pe ta zawk se, hei hian mipuite tan nasa takin awmzia a neih zawk an beisei thu an sawi.
NGHAM chuan sorkarin rate tha pangngai tak, kohhran damdawi in thenkhat leh damdawi in dangte pawh a pek ang emaw, phaia damdawi in tam takte a pek ang emaw a an pek theih chuan MUHCS zawm hi an hnial lo tih sawiin, “Kan zawm hian mipuite tan thatna tam tak a neih dawn avang te, phaia pawisa tam zawk sen ngai lova Mizoram chhung ngei a inenkawl a theih chuan mi tam tak tan malsawmna a ni dawn a, kan ram economy-in a that phah dawn bawk a ni,” an ti.
NGHAM hnuaia MUHCS la zawm lo hospital pakua-te hi — Trinity Hospital, Ebenezer Hospital, Greenwood Hospital, Aizawl Hospital, LRM Hospital, Agape Multispeciality Hospital, Rosewood Hospital, City Hospital leh Aizawl Adventist Hospital te an ni.