Lando Norris chuan McLaren-a awm zel tura inremna thar a ziah chu, a tan pawm mai chu thil awlsam a nih thu leh a inngaihtuah buai loh thu a sawi.
F1 champion lai hian Inrinni khan contract thar a ziak, kum 2030 tawp thleng McLaren-ah a châm chhunzawm dawn a. A contract hi a hmang zo a nih chuan McLaren-ah kum 10 a awm tling dawn tihna a ni.
Kum 26 mi chuan, “Team dang atangin sawmna ka dawng ve a; mahse, team dang zawma mi dang nena inelna hmachhawn ka duh lo va, khawiah mah ka kal dawn lo. Chuvangin, he thutlukna hi F1 ka luhchilh hnua awlsam ber a ni,” a ti.
British driver hi contract thar a ziah lawk loh avangin chhuak tur anga sawi thawm a awm hman a; mahse, Norris chuan a contract hlui zawkah pawh kum khat chuang a la neih avangin a hmanhmawh loh thu a sawi a ni.
McLaren tan a rinawm chhan chu an CEO Zak Brown leh team principal Andrea Stella te nen inlaichinna tha an neih vang a nih thu Norris-a chuan a sawi a, anni ang chu hmun dangah hmuh a inbeisei loh thu a sawi bawk.
F1 season kal mekah Norris hi drivers’ table-ah palina a ni mek a, Mercedes driver pahnih, Andrea Kimi Antonelli leh George Russell te bakah Ferrari driver Lewis Hamilton te a tluk lo mek a. Constructors’ table-ah McLaren hi pathumnaah awmin Mercedes leh Ferrari te bawk an tluk lo.
Norris-a hian season bul a tan tha tawk lo va; mahse, insiamrem chhoin dawhsanah vawi li a lawn tawh a, vawi hnih hnehna a chang tawh bawk a. Inelna hnuhnung pahnih, Hungarian leh Dutch Grand Prix-ah a zawna hnehna a chan avangin a inrintawk lai tak a ni.
Pathianni tlai dar 6:30-ah Italian GP a awm leh dawn a, Norris-a hian a zawna vawi thum chak ngei a duh a. Hetihlai hian table-a hmahruaitu, Kimi Antonelli te rama intlansiak tur an nih avangin a theihtawp a chhuah a ngai dawn a ni.