Gauhati High Court chuan Thawhlehni khan Special Judge, NDPS Court, Champhai-in ruihhlo thubuaia kum 10 lung in tang tur leh Rs 1,00,000 chawi tura a hrem tawh chu thiahsakin he thubuaia thil tisualtua puh, Lalrosanga chu thiam a chantir.
Justice Kaushik Goswami chuan he Criminal Appeal (Crl.A./10/2025) hi ngaihtuahin trial court-in thiam loh a chantirna leh hremna a pek tawh chu a tihtawpsak a. High court hian a hremna tawng mek hi a rang lama chhuah zalen a nih ngei nan release order chhuah vat tur leh thuneitute hnena hriattirna thawn nghal turin registry a hrilh bawk.
He thubuai hi October 18, 2024 khan Special Judge, NDPS Court, Champhai chuan NDPS Act Section 21(c) leh 25 hnuaiah thiam loh chantirin kum 10 tang tur leh pawisa chawi tura a lo hrem tawh a. Hetianga trial court thutlukna hi pawm lovin Gauhati High Court-ah appeal hi thlen zui a ni.
Court chhunga thutlukna puan a nih lai hian judgment kimchang peih hman a nih rih loh avangin order tawi chauh a la awm rih a, judgment kimchang a puitlin hnuah tihchhuah leh tur a ni ang.
He thubuaiah hian thubuai theh luttu tan Advocate Johny L. Tochhawng a ding a, Mizoram sorkar tan Additional Public Prosecutor C. Vanneihsiami a ding niin Supreme Court Advocate on Record JC Lalnunsanga’n a website-ah a tar lang.