Shanghai Cooperation Organisation (SCO) hruaitute chuan thuchhuah intawm siamin US leh Israel tang dunin Iran an beihna leh khawthlang ramten an member thenkhat an hrekna chu an dem thu an tar lang.
Kyrgyzstan khawpui, Bishkek-ah ni hnih summit an neih hnuah ‘Bishkek Declaration’ an tih hi an puang a. Summit-ah hian Chinese President Xi Jinping, Russian President Vladimir Putin, Indian Prime Minister Narendra Modi leh Pakistani Prime Minister Shehbaz Sharif te pawh an tel a. SCO-ah hian Russia, China, India, Pakistan, Iran, Belarus, Uzbekistan, Kazakhstan, Tajikistan leh Kyrgyz Republic te an tel a ni.
SCO hian ‘civil mi tam tak thihna leh an ram eibar nasa taka tawrhna thlena Islamic Republic of Iran beihna an dem’ tih an sawi.
US leh Israel tang dunin Iran an beihna chu ‘khawvel dan zam leh kalphung leh UN Charter bawhchhiatna, khawvel muanna, himna leh nghehna dinhmun tiderthawngtu’ tiin an sawi bawk.
“Member ramte chuan Islamic Republic of Iran mipui leh an sorkar chu Supreme Leader Seyyed Ali Khamenei-a leh indona tuartu chhungkuate kan tawrhpui tak zet a ni,” an ti.
SCO member-te hian ‘Islamic Republic of Iran-in ram hran leh inrelbawlna hran a neihna leh a nihna leh a ram chhunga hma a lakna chu an thlawp zel dawn a, buaina hi politic leh palai hmanga chin felna lam kan thlawp tlat bawk’ an ti.
Declaration-ah hian Israel-in Palestine a bei chu Asia khawthlang himna tiderthawngtu niin tar lan a ni bawk.
“Member ramte chuan Middle East-a muanna leh nghehna awm theihna kawng awm chhun chu Palestinian-te duh dan tha taka tiha an ram luaha awmtir a ni,” an ti.
US-in Iran leh a sumdawnpui ram angte a hrekna leh khawthlang ramten Ukraine a rûn avanga Russia an kawmserhna tar lang si lovin SCO member-te hian an declaration-ah hian ‘tum bik nena khairual lo taka khuahkhirhna’ kalpui chu UN leh World Trade Organization dan zam bawhchhiatna leh hei hian ‘a chhe zawngin khawvel eibar a nghawng thei’ tih an tar lang bawk.
Tangrual pawl hian Iran-in Nuclear Non-Proliferation Treaty (NPT)-a member a nih anga dikna chanvo a neih pawh an thlawp tih an sawi.
NPT ziaktu zingah US, Russia, China, UK leh France tih loh ram dangte chuan nuclear ralthuam an siam thei lo va; mahse, muanawm zawnga kalpui tur nuclear programme an nei thei a. Civil mite tan nuclear reactor an din thei a, research leh damdawi atan nuclear technology an hmang thei bawk.
US chuan Iran-in nuclear programme a neih chu nuclear bomb siam a tumna niin a sawi ve thung a. Kum 2015 khan ram pahnihte hian inremna siamin Tehran hi 3% thleng chauhva uranium tihchak phalsak a ni a, hei hi reactor atana hman theih, nuclear bomb siamna atana tlak si loh a ni.
US hian nikum khan Iran hi bomb-in Israel nen February atang khan an bei leh a, nuclear ralthuam siam an tumna tihtawpna tur niin an sawi.
US President Donald Trump-a chuan tual chhunga uranium a tihchak telin a nuclear programme chawlhsan vek turin a phut a, Iran hian NPT hmanga dikna chanvo a neih angin thil a kalpui mai niin a sawi ve thung.
SCO chuan Thawhlehni khan Iran tanna hi an thlawp tih an puang ta a ni.