Aizawl: Mizoram Pradesh Youth Congress Committee (MPYCC) chuan tun hnaia jail tang leh police custody atanga tang tlanchhuak an awm fo chu home minister chak loh leh inthlahdah vang a nih thu sawiin, ZPM sorkarna hnuaiah Mizoram mipui dinhmun a him lo hle niin an sawi.
Nilainia an thuchhuahah MPYCC chuan Mualthuam North tleirawl nunna laksaktu a puh, Denghmingthanga, police kuta a awm lai leh kutkawl pawh a bun lai renga mipui tan pawha him lo thei tura a tlanchhuak thei chu mak an tiin pawi an tih thu an tar lang.
Kum 2022 atanga August 2026 chhungin Mizoram jail hrang hrang atangin tang tlanchhuak mi 74 lai an awm tawh a. ZPM sorkar kum hnih leh a chanve chhung lek pawha tlanchhuak an tam em em mai bakah, chung zingah chuan pawngsual, tualthat thubuaia tang leh rukruk ching an nih fur avangin mipuite dinhmun a derthawng hle a ni tiin an tar lang bawk.
Mizoram Legislative Assembly Budget Session February 26, 2024-a Home Minister K. Sapdanga’n jail tangte zanah nula rima chhuakin zan reiah an haw leh thin tih a sawi tawh chu a department chan a hneh loh zia mualpho tak a tar lang niin MPYCC chuan an sawi a.
Hemi hnu pawha tang tlanchhuak an la awm fo hian Home Department-ah insiamthatna a awm loh zia a ti lang chiang hle a, Chief Minister-in DP&AR leh DM&R department-te Home Minister kuta atanga a chhuhsak pawh kha a department chan a hneh loh vang a ni lo maw tiin an zawt bawk.