Power & Electricity (P&E) Minister F. Rodingliana chuan a chenna inah smart meter vanga harsatna tawkte aiawh hruaitute kawmin, Revamped Distribution Sector Scheme (RDSS) hnuaia smart meter vuah hna kalpui mek chungchang a sawipui.
Inrinnia an inkawmnaah hian smart meter vanga harsatna tawk aiawh hruaitute chuan meter vuah hnuah bill a sang sawt ni a an hriat thute, meter hlui leh smart meter khaikhinna ‘check meter’ vuah tam zawk te, meter te check nawn leh te bakah rethei zawkte tana ruahmanna siamsak turin an ngen.
Minister chuan smart meter hi sorkar laipui scheme RDSS hnuaia Aggregate Technical & Commercial Loss (AT&C Loss) tihbona tura state tinte tana kalpui ngei ngei tura ruahman a nih thu a hrilhfiah a. Meter-te hi factory leh Aizawl a thlen hnuah department engineer-ten an check thlap thin thu leh khawl thil a nih angin tihsual zeuh a awm thei tih a sawi.
Harsatna awmte chingfel tur hian September 7–10, 2026 inkar hian Aizawl khawpui chhunga billing counter zawng zawngah ‘Complaint Chinfel Runpui’ buatsaih a nih dawn thu a sawi a. Billing counter-ah engineer-te thuttir an ni dawn a, complaint lutte a hmuna en fel an nih tur thu leh bill sang a hmuna pe chhuak zo lo rethei zawkte tan installment-a pek dan tur ruahman a nih dawn thu a sawi bawk.
P&E department engineer-te chuan meter hlui leh manual reading lak thinah tihsual a tam avangin smart meter hian minute tin power hman zat dik tak a chhinchhiah a, bill dik tak chawi a nih dawn thu an hrilhfiah a. Mipui harsatna neite chu social media-a a sawi mai lova department thawktute hnena thlen thin turin an ngen bawk.
He inkawmhonaah hian P&E Engineer-in-Chief Er. Ngursailova Sailo, Chief Engineer (System Operation) Er Laltlanthanga, Superintending Engineer, Aizawl Power Circle Er. Lalrinmawia leh Superintending Engineer (Works -II) Er. Zothansanga te an tel a ni.