Indian Football Leage (I-League) club zinga tlahniam lova awm rei ber, I-League champion pawh lo ni tawh, Aizawl FC-in Nagaland United SC hnena IFL khelh theihna license a hralhna tura inremna chu pawm a ni ta.
Asian Champions League playoff leh Asian Football Confederation (AFC) group league pawh lo khel tawh, Aizawl FC leh Naga club inemna siam hi All India Football Federation (AIFF) chuan Thawhtanni khan a puang ta a. Inremna hi induhsak tawnna rilru nena siam, ‘goodwill deal’ tiin an sawi.
Tun season atang chuan Aizawl FC-in IFL license leh participation rights a neih chu Nagaland United-in an nei tawh dawn a, Aizawl FC hian a la pui zui dawn a ni.
Aizawl FC hi kum 2012 atangin Robert Romawia Royte te chhungkuain a neitu nihna neiin kum 15 an enkawl tawh chhungin season 11 chhung azawnin I-League/IFL an khel hman a ni.
Club atanga thudawnna chuan president-te chhungkua hian football atana an sum ruahman sa, Rs nuai 3,000 chu zo tawhin kum khatah Rs nuai 100 bak an ruahman theih tawh loh avangin Mizoram atanga sum thawh duh leh neitu nihna nei tura sum seng duh an zawng a. An hmuh mai loh avangin Nagaland SC nen inremna an siam ta a, hei hi Mizote leh an club tana tha ber tur a nih thu an sawi.
Nagaland United SC hotupa, Nagaland Chief Minister Nephieu Rio leh Aizawl FC neitu hi inthian tha sa an ni a, kum 2014-a tuna MLA ni mek, Robert-a independent-a Lok Sabha MP-a a in-candidate pawh khan Aizawla campaign-puitu a ni.
Aizawl FC hi India-ah I-League chu league sang ber a nih lai, kum 2016 khan Federation Cup-ah final a lut a. Kum 2017 khan I-League-ah champion-in Asian Champions League playoff an khel phak a, Iran-a an chak loh hnuah AFC Group League an khel zui.
Mizo club hi tual chhunga league sang ber, Mizoram Premier League (MPL)-ah vawi nga an champion tawhin nomawi la zing ber an ni a. Club din thar leh hnuah Independence Day Football Tournament-ah vawi hnih champion tawhin final an lut fo bawk.
Aizawl FC hian nasa lehzuala Football academy kalpui a tum bawk a, AFC Complex Complex, North Lunglenga astroturf football ground sak zawh a ni a, hostel pawh an peih thawkhat tawh a ni.
Mizoram bakah Nagaland, Tripura leh Arunachal Pradesh-ah football zirna din belh an tum bawk.