Mizoramah lehkha ziak leh chhiar thiam 99.8% awmin, a hma aiin kan pung leh hret a, a lawmawm lam zel a ni.
Thawhlehnia International Literacy Day hmannaah he thu hi School Education department commissioner & secretary chuan sawichhuakin, Mizoramah a hma aiin ziak leh chhiar thiam kan pung leh hret a, 99.8% kan kaichho ta a ni, a ti.
Ziak leh chhiar thiam tamna state nih hi a hlu a, inchhuanna tham a tling a, sorkar pawhin theihtawp a chhuah thin bawk. Hetih lai hian ziak leh chhiar thiam rual ni si, thiam si lo kan awm a nih chuan tanlak lehzual a, inzirtirna kalpui chhoh zel pawh a tha khawp mai.
100% kai thei turin kan thiamna leh theihna hian a tlin a, midang kuta dah mai lovin mitin tang tlang ila, sorkar pawhin thapui thawhin beihpui thlak se la, kan chhehvelah ziak leh chhiar thiam lo an awm em tih thlengin i vil ngun deuh lehzual ang u.
Khawvel hmasawnna sang zelah ziak leh chhiar thiam nih hi a hluin, a tangkai telh telh zel dawn a, a thiam lote erawh chuan inkiltawihna chin an nei zel dawn. Ram hmasawnna leh thiamna sang tak nei kan nih zel theih nan kan tan lehzual a, ziak leh chhiar thiam vek tura mipui mimir pawh kan tan a va tul em.
Mizoram hi ziak leh chhiar thiam vekna state-a puan kan lo ni tawh a, a lawmawm hle rual hian thiam lo pahnih khat avang hian kan percentage hi a kangin, a hniam thei a, theihtawp chhuahin i tang zel ang u.