Aizawl: New Delhi-a International Literacy Day lawmnaah Education Minister Dr. Vanlalthlana’n Mizoram ziak leh chhiar thiam dinhmun a sawi.
Thawhlehni khan Dr. Ambedkar International Centre (DAIC), New Delhi-ah International Literacy Day vawi 60-na a thupui ‘Literacy for people, the planet and prosperity’ tih hmangin ropui taka lawm a ni a. He hunah hian Union Minister of State for Education Jayant Chaudhary-a’n uapin, ram chhunga fully literate state leh UT-a inpuang tawh hruaitute sawm an nih angin Education Minister Dr. Vanlalthlana chuan Khual Zahawm niin a hmanpui a, Mizoram sorkar hmalakna leh hmasawnna te a tar lang.
Dr. Vanlalthlana chuan Mizoram chu India rama Fully Literate State-a inpuang hmasa ber a nih thu sawiin, Periodic Labour Force Survey Annual Report thar berin a tar lan danin Mizoram literacy rate hi zaa 99.8 zet a tling tawh tih a sawi a. Kum 2027 chhiarpuiah pawh ziak leh chhiar thiam tam ber a nihna hi chhunzawm zel a nih theih nan state sorkar scheme ‘Rapid Action for Eradication of Residual Illiteracy Project (RAERIP)’ leh Central scheme ‘ULLAS’ hmangin chak taka hma lak mek a nih thu a sawi bawk.
He hlawhtlinna chang tura state sorkar hmalakna tlawmngai pawl te, kohhran, zirtirtu leh zirlai ten rinawm taka an thlawp tlat avanga lawmthu sawiin, NEP 2020 zulzuiin Critical Life Skills and Occupational Skill Development Programme hnuaiah thiamna chi hrang hrang zirtir a nih zui zel thu leh kum 2026 thleng hian training chhuak mi 634 an awm tawh thu Minister hian a sawi lang bawk.