P&E Minister F. Rodingliana’n Saichal khuaa thingtlang lo neih chu Mizo nuna bet tlat a ni tiin, kalsan lova tunlai mila hlawk zawka tharchhuah a pun theih nana her rem a pawimawh tih a sawi.
Agriculture leh Tourism department tangkawp huaihawtin Zirtawpni khan Zaupui, Saichalah ‘Lo Zawh Pui’ hlawhtling takin hman a ni a; he hunah hian Power & Electricity minister chu khuallian niin Tourism Minister Lalnghinglova Hmar chu Lo Zawh thlengtu a ni.
Sorkarin kuthnathawktute dawmkan nan theihtawp a chhuah tih F. Rodingliana chuan sawiin, ram tichhe lo zawk permanent farming leh khawl hmanga lo neih tihchangtlun zui zelin hma lak a nih thu leh he kut hi Mizo taka khualzin hipna (Agri-Tourism) tha tak a nih zui ngei a beisei thu a sawi.
Lo Zawh thlengtu, tourism minister pawhin thu sawiin tourism department chuan Mizote Mizona chhawmnung zel thei tur leh khualzinte hip thei tur ruahmanna a siam mek thu a sawi a. ‘Lo Zawh Pui’ hi agri-tourism leh horti-tourism inkaihhnawih pawimawh tak a nih bakah, sorkar thil tum lian tak department hrang hrang thawhhona tihlawhtlingtu leh Mizoram mipuite tana Saichal khua an hmelhriatna tur thil pawimawh tak a ni, a ti bawk.
He hmun hi C. Lalremruata, Chairman, Lo Zawh Pui Organising Committee chuan a kaihruai a ni.
Minister hi Sudhir Kumar, Principal Secretary, GAD, Vivek Kumar Maurya, SP, Saitual, Lallawmawma, Addl. DC, Saitual bakah tourism leh agriculture department-a hotuten an tawiawm a ni.