Middle East-a buaina chhuak meka ngaihdan inang lo pahnih, Iran leh United Arab Emirates chuan indona tihnepna tura BRICS-in thuchhuah intawm an siamah an hming an ziah hnan ve ve.
Iranian President Masoud Pezeshkian-a chuan Inrinni khan New Delhi-a summit neih mekah hian Abu Dhabi Crown Prince pawh kawmin hei hi indona a chhuah hnu ram pahnih hotu liante an inhmuhna hmasa ber a ni.
Abu Dhabi media office chuan hruaitu pahnihte hian an chhehvel leh khawvel huap thil te, indonaa inbengdaihna te, ngialnghehna leh an awmna vela muanna leh hmasawnna a awm theih dan turte an sawi dun tih a tar lang a. Thutlukna eng chiah nge an siam tih erawh a tar lang lo.
Kum 2009-a din, BRICS-in tun tuma summit an neih hi US leh khawthlang ramten khawvel kalphung an awp hneh hle laia anmahni tel lohna pawlin eng ang thu nge an neih dawn tih hriat theihna langsar tak a ni mek.
A tirah an pawl hi Brazil, Russia, India, China leh South Africa tangho telna niin Egypt, Ethiopia leh Indonesia an tel belh hnuah Iran leh UAE pawh an tel veleh a ni.
Summit huaihawttu leh palaite chuan Iran-UAE ngaihdan inang lo chin fel an tum a, hei bakah hian thla ruk chhung US leh Iran inkap tawn tawh chungchangte pawh an sawiho.
Buai chhungin Iran hian vawi tam tak UAE a bei tawh a, a hnuhnung ber chu August thlaa US sipai leh an helicopter dahna, Al Minhad Air Base a beih kha a ni.
BRICS-in Nilainia thuchhuah intawm an siamah, “Middle East/West Asia-a boruak tang tak awm hi kan vei hle a… inbengdaia hmabak zela thil tha lo awm zel thei siam thei laka insum turin kan ngen a ni,” tiin an tar lang.
Civil mite himna tur ngaihtuah tur te, mi ram leh inrelbawlna hran neihna inzahsak tur te, khawvel sumdawnna, mamawh inpekna, energy kaltirna leh tuipuia himna vawng turin an ngen bawk.
Summit neih hma hian ram inkungkaihna hriate chuan eng ang chinah nge Abu Dhabi leh Tehran ngaihdan a inan theih dawn hriat an châk hle a. Ngaihdan inang neia thuchhuah intawm siamnaa an tel ve hian ram inkungkaihna sawi danglam lo mah se pawl khatin inlungrualin ngaihdan an nei tih erawh a lang niin an ngai hlawm.
India-a Iranian embassy chuan an president leh UAE president fapa upa ber, amah thlaktu tur ni bawk, Abu Dhabi Crown Prince Sheikh Khaled bin Mohamed bin Zayed Al Nahyan te inkawm thlalak hi an tichhuak a, eng nge an sawi tih erawh an tar lang tel lo.
Summit thlengtu, Indian Prime Minister Narendra Modi-a chuan an pawl chu kum tam kal tawha din niin khawvel huapa inpumkhatna leh rah tha chhuah tura inher hun an ni tawh tih sawiin intawh khawm hawnnaah a sawi.
BRICS member-te hian khawvel huapa kal dan nghawng phak nih leh khawthlang ram chakten an thunun hneh tak tak nia an hriat – World Bank, International Monetary Fund leh World Trade Organization ang chi kalpui dan siam that an duh.
Summit-a tel zingah hian Russian President Vladimir Putin, Chinese President Xi Jinping leh South African President Cyril Ramaphosa te pawh an tel a, intawh khawm hi Pathianni thleng awh kha a ni.