Premier League chuan Boxing Day-ah dan pangngai angin inkhel tur an awm leh dawn tih an puang a, kumin December 26-ah inkhel pasarih a awm dawn a ni.
Nikum Boxing Day-ah khan Premier League inkhel pakhat chiah a awm a, Manchester United leh Newcastle an inkhel a. Premier League chuan Europe club inelna a zauh vang leh kartawpa matchweek 33 tal khelh a ngaih vang niin Boxing Day inkhel an tih tam loh chhan an sawi.
Ninganiah khan Premier League chuan 2026-27 season atan inkhelh thin dan pangngai chu an ruahman leh tur thu an puang a, Manchester City-in Newcastle an luhkhung tur chu inkhel tur langsar ber a ni ang.
Boxing Day inkhel bul tan tur chu Aston Villa leh Leeds United te inhmachhawn tur a ni ang a, hemi hnuah hian inkhel pali a awm nghal ang.
Everton leh Sunderland an inkhel ang a, Fulham leh Brighton an inkhel dawn bawk a, Ipswich leh Brentford an inkhelh dawn bakah Tottenham leh Bournemouth te an inkhel dawn bawk.
An rama tlai lamah Hull chuan Liverpool an mikhual ang a, Manchester City chuan St. James’ Park-ah Newcastle United an tlawh thung ang a, heng match pahnih te hi UK-ah chuan live-a pek chhuah a ni ang.
Inkhel pathum la bangte chu Pathianni, December 27-a khelh turin ruahman a ni a. Coventry leh Chelsea te an inhmachhawn ang a, Manchester United-in Nottingham Forest an hmachhawn ang a, Arsenal-in Crystal Palace an tlawh bawk ang.
Hemi zawha inkhel turte chu December 29 leh 30 a khelh a ni ang.
Premier League hian season khatah kar laihawl fixture round nga aia tam an nei tur a ni lo tiin an kalpui a. Kumin Boxing Day hi Inrinni a nih avangin league chuan chu midweek round nga huam chhungah chuan telh loin December 26 leh 27-ah heng inkhelte hi a dah thei a ni.
Kum 2028-a Boxing Day chu Thawhlehni a ni dawn a, Premier League hian inkhel tam zawk hi ni dangah an sawn leh dawn em tih chu hriat a la ni rih lo.