Vaihlo leh a kaihhnawih hi kan thlahtute atanga ti nasa tak mai kan ni a, vawiin thlengin kan bansan hlei thei lo a, hei hian kan dam chen tur aia rei lo min damtir a, kan hnam min suat nasatu ni pawhin a lang bawk.
Heti tak maia vaihlo leh a kaihhnawih kan khawih nasa ta mai hi a veiawm a, thangthar zawkte hi chu zirna in thlenga a hlauhawmzia zirtir a, inzirtirna kalpui pawh a tul tawh hle.
Zial zu mi tan mai ni lo, a khu lo hipchhawng lehtu tan hlei hlei meizial khute hi a hlauhawm nia sawi a ni a, vantlang hmun leh kalkhawmna hmuna meizial zuk khukte hi chin tam loh kan zir zel a va pawimawh em.
Kan hnam hian damrei a, hrisel tha turin vaihlo leh a kaihhnawih kan bansan hret hret a, zuk leh hmuam that lohzia kan inzirtir nasat hi a va ngai tawh em.
India ram pum anga ngaihtuah pawhin vaihlo leh a kaihhnawih khawih nasat lamah hian kan sang hle mai a, hengte hi cancer kan tam chhan nite pawh hian a lang hial thin.
Naupang zawkte atangin inzirtir ila, a hlauhawmzia hi infah mawlh mawlh ila, chhungkua pawh i tangrual teh ang u.
Rawlthar chhuak hlimten meizial zuk ruk hi pa riaua inhriatna an nei thinte hi a tur ve rengah ngaih ngawt chi a ni lo a, a hlauhawm zawnga kan hrilh a, zirlaibua telh a, naupang inzirtirna hmun zawng zawnga kan zir theih a va tha tawh em.
Nu leh pate pawh tangrual ila, kan inchhungah vaihlo leh a kaihhnawih awm lo tur leh ti lo turin theihtawp i chhuah tlang ang u.