Aizawl: Kumin Anthurium Festival chu October 1 atanga 3, 2026 chhungin Reiek leh Ailawngah nghah a ni dawn.
Tourism Minister Lalnghinglova Hmar kaihhruaiin a pisa-ah kumin Anthurium Festival neih tur chungchang sawi hovin an thukhawm a. Thutkhawmah hian Minister chuan he Festival hi Tourism leh Horticulture department bultum ni mah se, Mizoram sorkar buatsaih a nih anga department zawng zawng leh mipui thliar bik awm lova tel vek tura ruahman a nih thu a sawi.
Mizoramah khualzin an pun zel avangin a hlawkna chu tualchhung dawrkai, taxi driver leh mipuiten an tel a ni tiin, tualchhung leh state pawn atanga khualzin tam thei ang ber an lo kal nan festival hlawhtling tak siam a pawimawh thu a sawi bawk.
Thutkhawmah hian department hrang hrang, YMA, Reiek leh Ailawng khawtlang hruaitute, Zo Anthurium Grower Society, event management team leh Mizo Indigenous Games hruaitute an tel a. Festival chhunga hmalakna tur – cultural programme, adventure activities (trekking, puk luh, silai inkahsiak), naupang infiamna, pangpar huan tlawh, Mizo Infiamna chi hrang hrang entir leh festival chhimtute tana tel ve theihna tur thil chi hrang hrang siam tum a ni a. Mizo zaithiam lar te sawmin Leikapui Night leh a kharna concert ropui tak buatsaih tum a ni bawk.
Veivahna leh traffic harsatna a thlen loh nan traffic management, kawng chei that leh Travel Advisory tihchhuah tur chungchangte pawh an sawi ho a ni.