Argentina chuan October thlaa Benin nen an inkhelh turah Lionel Messi chu an squad an la telh a, forward tan hian ram leh ram inkhel a thlahna a ni ang.
Messi-a hian August thla khan 2026 World Cup final-a Spain an hneh loh hnu lawkah Argentina tana khelh a chawlhsan thu a puang a. Hemi hma hian a pa, Jorge-a’n a thihsan hnuah a football hma lam hun a chian loh thu a sawi tawh bawk.
Kum 39 mi, Argentina-in 2022 World Cup an lak tuma captain chuan La Albiceleste tana a khel tawh lo tur chuan ‘a tihrehawm hle’ a; mahse, ‘ka theihna zawng zawng ka pe’ tawh a, ‘a bak pek tur ka nei tawh lo’ tiin a sawi.
Ballon d’Or vawi ruak dawng tawh, Messi-a hi for Inter Miami-ah khel mekin Argentina tana goal thun tam ber leh khel tam ber a ni a, vawi 207 a khelhah goal 125 a thun.
“Khawvela player tha ber, national team chhinchhiahna, kan captain, Lionel Andres Messi hi lo tel tura sawm hi kan titlu a, Argentin-ah October 6-a a thlahna hman hi a phu a ni,” tiin Argentine FA President Claudio Tapia chuan a sawi.
Buenos Aires-a River Plate khelmual, mi 85,000 lenna, Estadio Monumental-ah Benin nen hian an inkhel dawn a ni.
Argentina-in 2022 World Cup an lak tuma player-te pawh he inkhelah hian sawm an nih thu Tapia chuan sawiin ‘hun hriat reng tur’ a thleng dawn niin a sawi.
Argentina hi World Cup laia Fifa disciplinary code an bawhchhiat avangin anmahni muala inkhel vawi hnih an thlen leh hmasak tur chu a zahve chauh entu an awm phalsak an ni.
Hremna hi football nena inkaihhnawih loh thila pho chhuah te, team awm dan fel lo leh anmahni tantuten mi huat theih tura an au leh thil an lantir kaihhnawih a ni.
World Cup semifinal-a 2-1-a England an hneh tum khan Argentina player eng emaw zatin British-ten an awp, Falkland Islands chu Argentine ram a nihzia lantirna banner an keng lang a ni.
September 20-ah Bolivia nen Cordoba-ah khelin Buenos Aires-ah October 3-ah Burkina Faso nen an inkhel leh dawn a. Heng inkhel pahniha hremna an tawrh hnuah Benin nen hian an inkhel zui dawn a ni.
Heng inkhelah hian Argentina midfielder Leandro Paredes leh Nahuel Molina te chu World Cup final-a Spain an hneh loh tuma khelmual chhunga an intihbuainaa an inrawlh danah inkhel vawi 10 leh vawi sarih tel thei lo tura hrem an nih avangin an tel thei dawn lo a ni.