Aizawl: Union Minister of State for Youth Affairs & Sports Raksha Nikhil Khadse chuan Nilaini khan Saitual District Hospital tlawhin, damdawi in dinhmun leh hmalakna hrang hrangte a enfiah.
Union Minister Khadse hian khum 50 awm theihna tur District Hospital Complex sak mek hnathawhte enin, hna hmabak a la tam avangin hun tiam chhunga zawh hman a nih theih nan thuneitute chu tan la lehzual turin a chah.
OPD building thar sak mekte a enfiah hnuah hman lai mek District Hospital tlawh lehin, damdawi in thawkten an mamawh leh harsatna hrang hrangte chu Union Minister hnenah hian an thlen a ni.
Union Minister hi Saitual District Bawrhsap Srinivas Sadi leh sorkar hotuten an tawiawm a, PMO Dr. V. Lalremruata, Medical Superintendent Dr. Lalhmunmawii leh hospital staff-ten lo dawngsawngin damdawi in hmunhma hi an fanpui a ni.