Aizawl: South Africa khawpui Cape Town-a CPA Conference vawi 69-na (69th Commonwealth Parliamentary Conference) neih mekah Assembly Speaker Lalbiakzama chu a tel mek a, ‘Artificial Intelligence in Parliament’ tih thupui hnuaiah Indian delegates aiawhin Lead Speaker atan ruat a ni.
He Conference hi September 13 atanga tan tawh niin, September 20, 2026 thleng a awh dawn a. Kumin atan a thupui ber chu ‘Unity to protect Multilateralism, Observing International Law for Equality & Development in the Commonwealth and Beyond: The Role of Parliaments’ tih a ni.
CPA-ah hian tun hmaa British awp tawh, Parliamentary system hmanga rorelna kalpui ram 56 an tel a, khawvel huapa Parliamentary System chawisan leh rualkhai zawka hmasawnna zawh tlan dan tur thupui hrang hrang an sawiho a ni.
Sawiho tur zinga pawimawh tak mai ‘Artificial Intelligence in Parliament: Current Applications, Prospects and Implementation Strategies’ tihah Speaker Lalbiakzama hi Indian delegates aiawha lead speaker tur hian ruat a ni.
Speaker hi Mizoram Legislative Assembly Addl. Secretary Lalthangmawia’n a tawiawm a. Nakkuma Conference vawi 70-na lo awm tur hi Ottawa, Canada-ah nghah a ni dawn bawk.