Sports Minister Lalnghinglova (Tetea) Hmar chuan MINECO-a a office chamber-ah Pathianni kaltaa 2026 Women’s Hockey Junior Asia Cup-a champion India team-a tel Mizo tleirawl pahnih, F. Lalbiaksiami, Lunglei leh Lalrinpuii, Hnahthial te lawmpuina hun a hmanpui.
Sports minister chuan, “Hockey hi a khel an tam a, hnam dangte leh ram inelna angah phei chuan champion nih hi thil harsa tak a ni a; chuvangin, Asia champion nih hi thil namai lo tak a ni. Mizoram min tihmingtha a, in hlawhtlinna hian Mizote leh infiam mi dangte bakah keimah pawh hi min tiphur a ni,” tiin a lawmpui thu a sawi.
“Empowering Mizoram Sports kan kalpui mekah hockey kan telh a, theihtawp chhuahin tan kan la zel dawn a. India hi hockey-ah a tha a, Mizote tana Olympic thlenga medal hnaihna ber pakhat a ni,” a ti bawk.
2026 Women’s Hockey Junior Asia Cup hi September 4 atang khan China-a Moqi Training Base-ah khelh a ni a. Under-20 inelna niin Pathiannia final khelhah India hian a zawna vawi thum nan an a champion a, 2027 FIH Junior World Cup khel turin an tling nghal.
“Hockey Mizoramin Thenzawla academy atangin player tha kan chherchhuak reng a. Player pahnih khat han vawrh chhuah chauh ni lovin a kum bithliah ang zelin a zawnin chherchhuah an nei ta reng a, hei hian kan kal dan a dik tih a tilang a. Kan kal dan a dik tawh chuan a mihring kan neih belh zel tawh dawn a, a zar kan zo zel dawn a ni,” a ti.
Thingpui inhona chu an inlawmpuina mai a ni a, inlawmpuina tak tak chu Incentive Cash Award sem hunah an dawng dawn tih a sawi bawk.
Minister hian sorkarin hockey hmasawnna tura hma a lak hrang hrangte leh hmalak dan tur ruahmanna awmte a sawi bawk a. Kawnpuia Boys’ Hockey Academy chu Thenzawl academy entawna tihlen tum a ni a. Muallungthu Hockey Academy tihchangtlun mek niin sprinkler system atan generator lian lei a ni tawh a. Hei bakah hian PMJVK atangin Hnahthiala hockey ground siamna tur remtihna a awm tawh a, Kolasib-ah India player Lalremsiami hmingin hockey ground siam tura hmalak mek a ni tih a sawi tel.
Lawmpuina hunah hian Henry C. Lalrawnkima, Director, Sports & Youth Services Dept. chuan thu sawi bawkin hockey-a hmasawnna tura hmalakna awmte chu hlawhtlinna hrang hrang nei thin player kal tawhte leh tuna khel mekte thawhrah zel a nih thu a sawi a, hei hian theihtawp chhuah tura a tihphur thu a sawi bawk.
He hunah hian Hockey Mizoram hruaitute leh player ten report pein thu an sawi bawk.