LESDE Minister Lalnghinglova Hmar chuan nimin khan ‘Yamaha Teens Rock 2026’ a champion Neuhof School Band te chu a office-ah lawmpuina hun a neihpui.
Yamaha Teens Rock hi India ram pum huapa naupang kum 18 chin hnuai lam music hmanga inelna lian a ni a, minister chuan Mizo tleirawlte, in hlawhtlinna a ropui kan ti a, Mizo mipuite kan lawm a, kan lawmpui tak zet che u a ni. India huap inelnaa pakhatna nih hi a awlsam lova, inelna hrim hrimah hlawhtlinna chang tur hian theihtawp chhuah a ngai thin, tiin. In music thiamzia hrethiam turin music thiam nih a ngai lova, kum lamah naupang tê la ni mah ula quality sang tak in nei tawh a ni, a ti.
Tourism Minister ni bawk Tetea Hmar chuan Neuhof School chu kumin Winter Festival-ah an talent pholanna hun siamsak an nih tur thu a sawi a. “Mizo mipuite mai ni lo, kan khualzinte hmaah zau zawka in talent neih pholanna hun in nei dawn a, in duh ang takin in lo inbuatsaih ang. Tourism in festival leh event hrang hrang kan neihah te hmasawn zel kan tum a, a tul chuan kan kaldan pawh kan her danglam hret hret dawn a ni,” a ti bawk.
Neuhof School Band member-te hi Principal bakah zirtirtu dangte’n an rawn tawiawm a. Labour, Employment, Skill Development & Entrepreneurship (LESDE) Department atangin Jt. Director Pu T. Thangropianga leh officer dangte an tel bawk.
Neuhof School Band Member-te:
- Sylvia C. Lalmuankimi – Class VIII
- Elnathan Vanlalnunzira – Class VIII
- Lalchhanchhuaha – Class VIII
- Robert Vanlaldina – Class VIII
- Lalthlamuani Pachuau – Class IX
- Grace Vannunmawii – Class IX