India khawpui, Delhi-a court chuan Gen Z-te kaihhruai, Cockroach Janta Party (CJP) hruaitu lu ber berte a chhuahtir a, khawpuiah hian a ni hnih nan Pathianni khan nawrh huaihawt a ni leh a, venhim hna thawktu pawh tam tak dah an ni a, kawngpui pawh khar a ni.
India-a chief justice-in hna nei lo thalai thenkhat chu ‘cockroach’ nena a tehkhin hnu, May thlaa he movement hi tantu, Abhijeet Dipke-a leh an pawl hruaitu dangte hi Inrinni khan inthlan kalphung siam that nawr huaihawt tura an thlen veleh man an ni.
A chhuah hnua a thusawi hmasa berah Dipke-a chuan ‘CJP chu an hnungtawlh dawn lo va, an hlau lo’ a ti.
Inrinni khan chanchinbute chuan nawrh huaihawttu mi 7,000 man an ni a, a hnu zan reiah chhuah an ni tih a tar lang hlawm.
Political party anga inziak lut lo, CJP hian state lian tak taka inthlan hma lawkin inthlan kaihhnawihah insiam that a nawr mek.
Chief Election Commissioner (CEC) Gyanesh Kumar-a’n vote neitute list a tihdanglam nia puh a nih avangin bâng turin an phut bawk, voter list tihdanglam hi Election Commission of India (ECI) chuan a nih loh thu a sawi thung.
Pathianni tuk khan CJP ukil, Ratna Singh-i chuan Dipke-a leh an hruaitu dang pahnih, Saurav Das leh Ashutosh Ranka te chu police-ten magistrate hmaah an hruai dawn tih police-ten an hriattir thu a sawi a, ‘vantlang muanna an vawng theih nana’ hren dan an dap tih a sawi.
Hemi hnu hian X-ah court-in ‘kum khat chhung remna bawhchhiatna an tih loh tur thutiam nen’ a chhuah zalen thu a tar lang a – a hnuah he thu delhkilh hi a paih (delete) leh.
A chhuah hnuah Dipke-a hian X-ah, “Modi-a hi PM a nih angin India tan chuan mualphona a ni,” a ti.
A thu tar lan dang pakhatah chuan a pi chu a hma zan lama a man lai velin a thi a, a vuinaah tel turin a khuaah a kal tih a sawi.
“He lungngaihna hun lai hian ka chhungte bula awm turin ka khuaah ka kir leh a ni,” a ti a, Das-a leh Ranka-a te hian Delhi-ah thuthar lakhawmtute an kawm dawn tih a sawi bawk.
“CJP hi an hnungtawlh dawn lo va, an hlau lo ang,” a ti bawk.
Inrinni khan police hotute chu an thlawhna a tum ruala Dipke, Das leh Ranka te an man theihna turin an chuang ve a ni.
Police chuan Inrinnia nawrh huaihawt hi India khawpui chhunga hmun pawimawh tak, Jantar Mantar-a neih phalna an pe duh lo va, khawpui chu virtual lockdown-ah a awm a, nawrh huaihawtte hi an thlen lohna tur venna siam a ni.
Metro station 45 vel khar a ni a, Delhi-a rel station lian ber berte pawh khar a ni a, rel service lian ber ber pawh an zin thulh a ni a. Pawn lam atanga zin tum tam tak chu an kalna kawngah chhuktir an ni a. Central Delhi-ah pawh ni khat chhung atan internet tihthih a ni bawk.
Pathianni khan a zawna ni hnih nan Delhi laili hmun tam zawkah kawngpui khar a ni a, pisa, dawr leh thingpui dawr te pawh khar a ni a, internet service pawh tihthih a ni bawk.
Delhi chhunga bazarpui leh intihhlimna hmunpui ber zinga mi, Connaught Place-ah chuan police barricade hun tlar a ni a, police leh paramilitary sang tam takin an veng.
Chawhnu her hret thlengin nawrh huaihawttute hi venhim hna thawktuten an tam hneh viau rih a, a hnu zelah eng nge thleng dawn a hriat loh thung.
Pathianni khan Supreme Court chuan internet, rel leh thil dang tihtawp leh mi man vak vak chungchanga complaint awmte ngaihtuah turin a bikin a ngaihtuah a. Court chuan sorkar chu vantlang boruak tibuaitu a awm loh chuan internet siam that leh metro leh rel service-te chu a pangngai anga kalpui turin a ti a. Court chuan mipuite zalen taka kal phal a nih tur thu leh dan lova hren a awm loh tur thu a sawi bawk.