Aizawl khawpui chhungah police training te nen traffic police te an thawkrim zual hle a, hmun hrang hrangah lirthei endik leh dahna hmun tur ni lova dahte endik hna an kalpui thin a, an fakawm hle.
Lirthei a pung a, mihring kan tam zel a, kan kawngpui erawh a chep tial tial thung. Hetiang hi kan dinhmun a nih tawh laiin traffic police lam erawh thuam chak an la ni hlei thei lo a, sorkar in a bik taka lak pawh nei thei lovin vawiin thlengin hmun hrang hranga mi pawhkhawm an la ni.
Veng hrang hrang leh daipawn deuha lirthei endik hna an kalpuite hi chhunzawm reng ni thei se la, dan dik lova lirthei khalhte vai hna hi thawk ngawrh lehzual bawk se, pathianni leh zan lam thlenga duty an awm thinte hi nunau leh tar chak lo zawkte tan hlei hlei hian a va hlu lehzual tak em.
Traffic police te thawhrimzia leh an inpekna sanzia hi sawia fiah mai chi a ni lo a, hei vang hian sorkar pawh hian ngaihsak lehzual se la, a bik taka hna lakah telh thei lo mahse nasa zawkin thuam chak se la, kan kawngpui hian chhantu a ngai nasa tawh ania.
Tuna kan lo inven lawkna leh thahnemngai taka khauh taka an kalna hi a thlawn lovang tih a chiang a, kan ram hian ralmuan phah nan a hmang ngei ang. Chuvang chuan duat ngai traffic police te hi duat lehzual ni thei se la, kawngpui dunga lirthei riah thinte tawmimin, dan dik lova lirthei khalhtute i zim tawt zel ang u.