Aizawl: 1Environment, Forest & Climate Change leh Fisheries department Minister Lalthansanga chuan Thawhtannia ZPM chhung inkhawmah thu sawiin, Forest department-a post ruak awm hnawh khat turin hna lak buatsaih mek a nih thu leh, Fisheries leh Soil department hnuaiah mission pawimawh tak tak kalpui mek a nih thu a sawi.
Lalthansanga chuan Forest department-ah tunah hian hna ruak zaa 71 vel a awm avangin kum 2026–2027 chhunga lak hmabak post 143 zet a awm tawh tih a sawi a. Advertisement chhuah tura inpuahchah mek niin Forest Ranger 10, UDC 6, Forester 20, Forest Guard 25 leh UDC (PE) 15 te lak a ni dawn a; kumin atangin Forester leh Forest Guard laknaah physical leh written test mark 200 ve ve pua kalpui a ni tawh dawn a. Mizoram chu India rama forest cover nei tha ber (85.26%) a nih avangin budget zaa 10-in a pun belh thin thu sawiin, ramngaw humhalh tlat a tul thu a sawi a, Serlui, Pualreng leh Kawrthah lamah thing kih ruk vanga ‘Zero Tolerance’ puan a nih bakah Forest Guard leh Forester suspended hial an awm thu a sawi.
Fisheries department chungchang sawiin, Minister chuan sorkar thar hnuaiah hnathawk 21 lak thar an nih bakah hmannia Demonstrator 10 lak tumnaah Recruitment Rules zawm thei mi pariat chauh an awm thu sawiin, nu leh paten fate subject thlan kawngah puih an ngai hle tih a sawi a. Mizoramah phai sangha tam tak lakluh thin laka intodelh turin CM Fisheries Mission kalpui a nih dawn thu leh Central YMA nen thawh hovin October 10 atanga November 30 thleng ‘Zero Tolerance’ hmanga luidung sangha man khap a nih thu a sawi bawk.
Lalthansanga chuan Sericulture hnuaiah Handholding policy kaltlangin Muga tiak sem a nih thu leh Soil department hnuaiah CM Rubber Mission kalpui mekin Phase I & II-ah hmun zau takah rubber phun a nih tawh thu leh Phase III tan target siam mek a nih thu a sawi a ni.