Mizoram Labour Link LPS Pro Fight hmawrbawk a hnai tawh a, Thawhlehni zanah title chuh tur zawnna final neih a nih rualin hmeichhia leh mipui hmuh châk inhnek buatsaih a ni ang.
Weight hrang panga zinga pahnih – bantam leh welter-ah champion laiten title an humhim dawn loh avangin semifinal-a chakte Zirtawpni zan title fight-ah an inlan nghal dawn a, weight dang pathum – fly, light leh middle-ah title chuh tur zawnna final huaihawt a ni dawn a ni.
Fly-ah Vanlalenkawltira leh Lawngtlai Vengpui boxer Moses Lalruatfela an inhnek dawn a, a chak zawkin champion lai, Lalrinngheta a hmachhawn thei dawn.
A zawna vawi thum title fight-a inlan turin Kulikawn boxer Enkawla’n vawi khat chak a la mamawh a, kum 2024 khan tuna champion lai, Tuipui tlangval Rinngheta a hneh lo a, 2023 title fight-ah NT Lalbiakkima a hneh lo bawk a ni.
Hetih lai hian a vawi khat nan title fight-ah kum 20 mi, Ruatfela a inlan dawn a, vawi thum a khelh tawhah awlsam takin a chak vek.
Light-ah Chhiahtlang boxer Lalruatmawia leh Sairang Sihhmui rawlthar, Abednego VL Dinpuia an innuai dawn a, an pahnih hian title chuh tur zawnna final-a an inlan vawi khatna tur ve ve a ni.
Kum 2024 khan semifinal-ah Ruatmawia’n tuna champion lai, Venghlui boxer Lalkhawngaiha a hneh lo a, Dinpuia’n a hmain Pro Fight-ah hriat tham hnuhma a nei lo.
Middle-ah mi thar pahnih, College Veng boxer Vanlalhriata leh Bawngkawn West rawlthar, Samuel Zadeng an intawng dawn a, a chak zawkin champion lai, F Lalthanliana Junior kut atangin title chhuhsak an tum dawn a ni.
Middle-ah Thanliana champion kawnghren laksak tumin boxer 27 an tel a, heng zingah hian seed pek pali an awm a, Hriata’n seed sang ber leh 2023 champion C Lalhruaitluanga leh seed sang palina PC Remruatdika a hneh a, kum 19 mi, Samuel-a’n seed sang ber dawttu, Lalruatzela Hauzel leh seed sang pathumna, Franky H Vanlalruatpuia a hneh ve thung.
Exbibition Fight pahnih zeh tel a ni dawn a, hmeichhe boxing tihlar nan L Vanlalduati, College Vaih, Siaha leh Rebecca Lalfakawmi, Chuhvel, Mamit district an inhmachhawn dawn a, mipui lawm hlawh Sakawrdai boxer Lalremthanga Hmar chuan amah chotu, Sihphir rawlthar, Lalhmingsanga a inhnekpui bawk ang.
Thawhlehni zan title chuh tur zawnna final leh Zirtawpni zan Title Fight-ah a hmuna en tur tan ticket Rs 100-in zawrh chhuah a ni dawn a ni.