China leh North Korea chuan Ningani hian New Yalu River Bridge chu lirthei tlan theih turin an hawng dawn niin China-a sorkar news agency Xinhua chuan a tar lang.
China hian kum 2014 khan a lam atanga lei dawh hna hi a lo zo daih tawh zawk a, he lei hian an inkara sumdawnna pawh a tihthan an beisei a. Hetih lai hian North Korea hian an lam atanga dawh chu Pyongyang-in nuclear ralthuam a enchhin avanga UN-in a hrekna chu Beijing-in a thlawp ve bawk avanga an inkar that loh phah karah kum eng emaw zat chhungin an zo ve mai thei lo a ni.
Russia leh North Korea inkalpawhna lei thar leh hmasa ber chu tun thla tir khan hawn a lo ni tawh bawk.
China hian tun hnaiah North Korea-ah thil a thawn chhuak nasa hle a, kum liam ta khan $ tluklehdingawn 2.3 man thawn chhuakin kum ruk chhunga a thawn tam ber tum a ni a, a hma kum aiin 25%-in a thawn tam bawk a. Chinese President Xi Jinping-a pawhin June thla khan Pyongyang a thlawh a, hei hi kum 2019 hnua a tlawh lehna hmasa ber a ni.
Kum 2018 atang khan Beijing hian Pyongyang nena inkungkaihna siam that leh tumin hma a la tan a, hetih hun lai hi Washington pawhin North Korea hnaih dan a dap ve mek lai a ni bawk.
China-North Korea inlaichinna hi Korean War lai atanga nghet tak kha a ni tawh a. Kum 1961 khan ram pahnihte hian Treaty of Friendship, Cooperation & Mutual Assistance an tih chu an ziak a, hei hi tun thlenga China-in sipai kaihhnawiha ram dang nena inremna a siam awm chhun a la ni nghe nghe.
He inremnaah hian ram khawi zawk zawk hi ram dangin bei se a tul anga inpuihna tur pawh a tel a ni.
China hi North Korea-in a kawmngeih leh kum tam chhung tantu a ni chungin kum 2017 khan Pyongyang-in nuclear weapons programme a neih kaihhnawihah hrekna an pek chu Beijing-in a thlawp ve avangin an inkawmngeihna a tlahniam ta hret thung.
Mi thiamte pawhin North Korea hian tun hmaa Beijing-a a innghahna chu kalsanin Russia a kawmngeih thar phah niin an ngai a ni.
North Korea leh Russia hian kum 2014 khan comprehensive strategic partnership treaty an siam a. Hemi hnu hian sipai leh politic-a an inkar hi siam tha zelin North Korea hian Russia-in Ukraine a beih mekah pawh a sipai tam tak a tir a ni.
US President Donald Trump-a pawhin thla hmasa khan Pyongyang nena inbiak that leh a duhna lam hawi a sawi a, North Korean hruaitu, Kim Jong Un-a nen hian kum 2019 khan inbiain hlawhtlinna erawh a nei lo va. A term hnihnaah Trump-a hian hmuh leh a duh niin a lang a, an inkawm dawn tih erawh a la chiang lo.
North Korea hian a hlawmna an ram tlawhtu tam ber, Chinese-te tan tourism visa a la pe chhuak lo chhunzawm zel.
North Korea leh Russia insumdawn tawnna hi sipai thil a ni ber a, China nen erawh vantlang mamawh, mipui eibar chawi kan theihna lam thil niin mi thiamte chuan an sawi.