Aizawl: Samagra Shiksha hnuaia Higher Secondary School Science stream-a lecturer la hmuh lohna school-a zirlaiten harsatna an neih loh nan leh zirlaiten an tuar loh nan lecturer hmuh a nih hma chu tutor rawih mai a tul thu Education Minister Dr. Vanlalthlana chuan a sawi.
Nilaini khan School Education Complex Conference Hall, Macdonald Hill-ah Education Minister Dr. Vanlalthlana ho hian School Education Department officer-ten Quarterly Review Meeting vawi 9-na an nei a. Meeting-ah hian department hnathawh leh hmalakna chi hrang hrangte thlirho niin, minister chuan Quarterly Review meeting an neih thin chu zirna siamthatna kawngah an sawtpui thu leh department officer-te mahni thawhna hmun theuhah tan la zel turin a fuih.
Minister chuan PM SHRI school-te chu Prime Minister-in a ngaihpawimawh avangin leh sorkar atanga sum pawh dawng tha an nih avangin hmasawnna hna thawk tha zual tura tan lak a tul thu a sawi bawk.
He meeting-ah hian zirna in hrang hrang a department hmalakna leh hmachhawp hrang hrangte an sawiho a ni.
Thutkhawmah hian Supreme Court thupek zawm a, hmeichhe naupangten an thla tin period an neih laiin him leh lungmuang taka an insawngbawl theihna tur ruahmanna siam chungchang sawiho a ni a. Pawl 6 atanga pawl 12 thleng, private school-te pawh tiamin, Supreme Court order hi zawm vek tura hriattir an ni.
Court thupek angin mipa leh hmeichhe tan inthiarna hranpa siam te, kut silna leh inthlakna room siam te, laklawh thila hman tur sanitary napkin kawl te, leh naupang chetsual palha hman tur spare innerwear leh uniform kawl tura hmalak a nih thu leh hengte hi endik zui reng a nih tur thu sawi a ni bawk.