Kanan Taxi Welfare chuan Thawhlehni khan Mualhawih Picnic Spot, Sakawrtuichhun-ah kum tawp intihhlimna hun an hmang a, he hunah hian MNF Treasurer, Lalruatkima chuan khuallian niin a hmanpui.
He hun hmanpuinaah Lalruatkima chuan Zoramin mikhual leh khualzin a ngah chhoh zel thu sawiin, driver-te chu ram darthlalang pawimawh tak an nih angin tan an lak sauh sauh a ngai tih a sawi a. Rel-in Mizoram a pawh chhoh zel takah leh khualzinte an lo luh chhoh zel takah chuan driver-te pawh an tan a ngai hle tih sawiin, khualzinte lakah hawihhawmna leh Zonunmawi tlawmngaihna lantir tura fuihin, dik tak leh fel taka mahni hna thawk tura ngenin thu a sawi bawk.
MNF Treasurer chuan, “Khualzin phur driver-te ram hmasawn zelah hma kan sawm ve zel a pawimawh a. Hawihhawmna leh inbiak pawhna, tawng thuah pawh hmasawn zel kan ngai a ni. Engtik lai pawha inzir zel tur mihring kan nih angin kan inzir zel a pawimawh a ni,” a ti a. “Kan driver-te kan chhuang che u a, chhuan tlak ni deuh deuh turin in hun hmang zel ang che u,” a ti bawk.
Kanan Taxi Welfare inhmuhkhawm hi Lalhriatpuia, Treasurer-in a kaihruai a ni.