LPS Vision Production buatsaih zai intihsiakna Youth Icon 2026-a tel tum te’n an zai video an theh lut zel a, mi 300 chuangin video hi theh lut tawhin, kumin Youth Icon title sponsor chu Furniture zuartu lar EverHome a ni.
Youth Icon hnuhnung 2019 leh 2024-ah te khan LBS Suzuki chu title sponsor an ni a, kuminah a vawi khat nan EverHome, house of furniture-in title sponsor an chang ve thung a, 2025 khan Pro Volleyball title sponsor an ni tawh bawk.
Hetih lai hian LBS Group chuan an hnuaia rangkachak zawrhna Mia by Tanishq hmangin tun tumah hian an sponsor tho a. Sponsor dang te chu Mizoram Bana Kaih (Handholding) Scheme, Govt. of Mizoram te, Top Tiles, Bawngkawn leh Falkland leh Kuriz Collection, Falkland te an ni.
EverHome Youth Icon 2026-a tel tumte tan hian application form lak chhuah ngai lovin virtual audition neih tur a ni a, October ni 1,2026 atang khan Telegram hmangin mahni zai lai video thehluh theih a ni a, tun thlengin mi 300 chuangin Video an theh lut tawh a; October ni 24,2026 (Inrinni) thleng hian Video hi a theh luh theih a ni.
Video theh lut turte hian an zai tan hmain an hming, veng, khua leh district sawi hmasak tur a ni a, Guitar emaw Keyboard emaw a khawi emaw zawk zawk hmangin an zai rem tur a ni a, zai nan hian Microphone hman a remchang lo.
Hla chang khat leh a thunawn emaw, thunawn nei lo chu chang hnih sak tur a ni a, audio leh video edit phal a ni lo a. Audition Round paltlangte hian November ni 3,2026 atangin 1st Round intihsiak an hmachhawn anga, LPS Studio-ah intihsiakna neih a ni anga, LPS 1-ah Live in pek chhuah a ni ang.
LPS chuan EverHome Youth Icon 2026-a lawmman turte pawh an puang chiang tawh bawk a, pakhatna in Rs. nuai 2 a dawng dawn a, pahnihin Rs. nuai 1 leh pathumnain cheng sing 7 an dawng ang.
Youth Icon hi 2006 atangin vawi sarih buatsaih ani tawh a, Youth Icon hmasa ber Zoramchhani hnu ah 2007 khan Malsawmtluangi, 2009-ah R Lalhmangaiha, 2012-ah H Lalrempuia, 2016-ah K Lalthlamuankimi, 2019-ah Zothanpuii leh 2024-ah Lalsangliana te thlan an ni.