Aizawl: Pathianni tuk dar 5:30 vel khan Aizawl Chaltlang venga cheng, R. Lalthakima, kum 42 chu taksa insawizawia a kal laiin hnam dang khalh truck-in a su hlum.
Thudawn danin, R. Lalthakima hi Chaltlang Lily veng, Fisheries department pisa bul phei kawng sira a insawizawi laiin kawng chhaka a motor dah a pan chu hnam dang khalh truck chak taka tlanin tai tluin a chil zui a ni.
Health & Family Welfare department-a thawk, R. Lalthakima hian a nupui leh a fate pahnih a kalsan a, Pathianni chawhnu dar 3 hian vui a ni a. A chil hlumtu hnam dang truck driver hi police-in an la nghal a, he thu buatsaih a nih mek laiin an la kawl a ni.
R. Lalthakima hia UPC (NEI) North Mizoram district-ah rawngbawltu, evangelist a ni a, Chaltlang Bial Sunday School Director dinhmun chelh lai mek a ni.