Aizawl: Accounts & Treasuries hnuaia Treasury Office-te chuan Finance Department thuchhuak bawhzuinain Thawhlehni khan a ni hnihna atan Assembly Annexe Conference Hall-ah Pensioner leh Family Pensioner Physical Verification an nei chhunzawm a, ni hnih chhung hian pension case 2,500 vel endik zawh a ni tawh.
Pensioner-te an hahdam zawk nana Assembly Annexe-a endikna hi zing dar 9 atanga tanin, chhun dar 12 khan nimina hun pekte zawh fel hman thawkhat a ni.
Official-te sawi danin Central Treasury Rules angin physical verification hi kum tin November thlaa District Treasury Office-a inlana neih thin tur a nih laiin, Mizoramah chuan Mizoram Civil Pensioners Association (MCPA) nen inremsiamin an veng branch-te kutah dah a lo ni tawh thin a; mahse sorkarin pension case dik lo endikna hma a lak chhunzawm zel avangin kumin bik atan hian Treasury Office thuneihna hnuaiah physical verification hi neih tura ruahman a ni.
Aizawl North leh South Treasury Officer-te chuan department hrang hrangte tan ni bik leh hun hrang ruat an nih thu sawiin, tar, chak lo leh damlote chu hmasaktir an nih thu leh inlan thei lote chu an awmna hmunah endik tur an nih thu an hrilh a; Jeevan Pramaan kaltlanga Digital Life Certificate nei tawhte tan erawh a hmunah kal specific-a a ngai lo a ni.
Sorkar hmalaknaah hian pension dik lo thahnem tak hmuhchhuah a nih tawh avangin mipui sum dik taka hman a nih theih nan pensioner-te leh an chhungte chu sorkar hmalakna tawiawm tha turin an ngen bawk.