Aizawl: Secretariat Conference Hall, MINECO-ah Thawhlehni khan Home Minister K. Sapdanga kaihhruaiin ‘The Mizoram Fireworks Regulation Act 2026’ kalpui dan tur inrawnkhawmna hun neih a ni a, he hunah hian Home Department, Police, Administration, YMA, AMC leh MIMA hruaitute an tel.
Home Minister K. Sapdanga chuan halpuah leh halmawi hal khap kawngah khuahkhirhna khauh tak kalpui aiin a nghawng tha lo inzirtir a, hal lo tura inngenna siam chuan awmzia a neih thui zawk a beisei thu a sawi a; ram nuam leh thianghlim a nih zel theih nana hma latu YMA leh kohhran, khawtlang, sorkar leh sumdawng pawlte tanrual a pawimawh thu a sawi.
Thutkhawmah hian Home Secretary Vanlalmawia, IAS chuan ‘The Mizoram Fireworks Regulation Act 2026’ chungchang sawifiahin, halpuah leh halmawi hal, kawl leh zawrh khapna leh a hremna hrang hrang awm te, he dan kengkawh tura High Level Committee, District Supervisory Committee leh Local Supervisory Committee din dan turte a hrilhfiah bawk.
He dan thar hi thuthar lakhawmtute, kohhran leh khawtlang hruaitute kaltlanga mipui hnena zau zawka zirtirna neih dan tur te, Krismas vuakveta halpuah leh halmawi lut tur danna kawnga Mizoram Merchant Association (MIMA) nena tang ruala hmalak dan tur te leh kawng hrang hranga mipui hnena ngenna siam dan turte sawi ho a ni.