Premier League-ah UEFA Champions League khelpha tura a sang pali inchuhna a nung a. Pathumna luahtu Chelsea an chetsual zarah an hnuai a awm North London club pahnihten remchang an la.
Arsneal in West Ham United tlawhin hnehna an sual chhuak a. Lehlamah Tottenham in an mikhual Leicester City 3-1 in an hneh.
Gunners thawm a ring
London Stadium-ah season thar a Europe huap inelna khelhphak ngei tum West Ham United in Arsenal an mikhual a. Mikel Arteta pawlten hnehna an sual chhuak.
Minute 38-naah Bukayo Saka corner atangin Rob Holding chuan an goal hmahruai a khung a. Hei hi halftime dawnah Jarrod Bowen chuan sutin Vladimir Coufal cross a thai lut.
Second half tan tir lamah erawh Gabriel Magalhaes inlarin Gunners defender in an chakna goal a khung a. Hammers hi Premier League a an match hnuhnung pali-ah chak hmel an hmu lo.
Arsenal boss Mikel Arteta chuan, “Chak a pawimawh a, football mawi khelh loh pawhin chak dan zawn a tul. Vawiinah kan ti thei a, hei hi club lian zia a ni.” a ti.
Lampard-a ten beisei la nei
Everton in Goodison Park-ah an manager club hlui Chelsea an mikhual a. Goal khat an khung chu Blues in an sut thei lo.
Merseyside mipui thawm a ring a, minute 46-naah Richarlison chuan Cesar Azpilicueta ball chhuhsakin tun season a a goal 9-na a khung a. Vitalii Mykolenko chuan an goal hnihna a khung teuh.
Tlak hlauhawm a awm Everton tan goalkeeper Jordan Pickford chu chhandamtu a ni ve leh bawk a. Azpilicueta leh Antonio Rudiger te goal khung tur a dang a. Mason Mount-a’n goal ban a pet per bawk.
Everton boss Frank Lampard chuan, “A tawp thlenga nawr thin team an ni a, chuvangin kan tang tluan hian fak a phu. Kan team, stadium khat a fans te nena kan thawhhona a tha a, fans te kha man of the match an ni. Kan mamawhzia an tilang a, anni vanga chak kan ni.” a ti.
Chelsea boss Thomas Tuchel chuan, “Kan matgch hnuhnung pali atang point hmuh mumal kan nei lova, hei hi ngaihmawh tur a ni. Kan lakah goal khung a awl a, match li chhunga goal venhim vawikhat chiah kan nei.” a ti ve thung.
Spurs an chak
Tottenham in an hmelma Arsenal chu hnaih taka umin hnehna an chang a, Tottenham Hotspur Stadium-ah 3-1 in Leicester City an hneh.
Spurs tan a match hnuhnung panga a goal khung tawh lo Harry Kane chuan goal hmahruai a khung a. Son Heung-min chuan goal hnih a khung belh bawk a, tun season-ah league goal 19 a khung tawh.
Tottenham manager Antonio Conte chuan November a team a enkawl tanin Champions League beisei ngam an nih loh thu a sawi a, “Tuman hetiang hi an beisei pha lo. Mahse heng player-te hian he dinhmun a din hi an phu a, England-ah UCL khelpha tura inchuhna hi a namai lo hle.” a ti.