England lakah World champion leh European champion ni lai, Spain chu tlawm mah se mipa FIFA ranking tihchhuah tharah an dinhmun a danglam phah lo a, a chungnung ber an la ni tho.
Inkhel vawi 43 tlawm lova an kaltluanna chu England-in tihtawpsak mah se Spain chuan dinhmun sang ber an la luah chhunzawm zel a. Pahnihnaa awm, World Cup finalist Argentina nen an la inthlau hle a, France chu pathumnaah an la awm reng bawk.
Madrid khawpuiah 3-2-in chak mah se England chu palinaah an la awm a, heng team chungnung palite hi World Cup semi finalist-te kha an ni.
2027 Africa Cup of Nations khel tura an tlin theihna kawnga a zawna Niger hnehtu, 2030 World Cup thlengtu tur zinga mi, Morocco chu hmun hniha sangah chhoin panganaah a inhlang kai a, hei hi kum 34 chhunga FIFA ranking-a an dinhmun san ber tum a ni.
Portugal leh Brazil te chu hmun khat ve vein an tlahniam a, parukna leh pasarihnaah an awm.
Portugal leh Spain chuan Morocco rualin World Cup lo awm tur an thleng ho dawn a ni.
South America-a kum 100 tlin lawmna pualin Argentina bakah Paraguay leh a hmasa ber, 1930 World Cup thlengtu, Uruguay pawhin inkhel pakhat theuh an thleng dawn bawk.
Fifa ranking tharah hian Belgium leh Netherlands chu an awmna pangngaiah an la awm zel a, pariatna leh pakuana an ni.
Colombia chu dinhmun pakhata hma sawnin Top 10-ah an lang a, hmun thuma tlahniam, 13-naa awm ta, Mexico hmun ruak an luah.
Coach Mauricio Pochettino-a’n Manchester United a zawm hmaa a khelhpui hnuhnung berah Haiti laka a zawna vawi hnih an chak hnuin United States chu 16-naah an la awm zui a. US leh Mexico hi March 25-ah Los Angeles bula SoFi Stadium-ah CONCACAF Nations League semi final-ah an inhmachhawn leh dawn a ni.
Japan chu 17-naah awmin Asia khawmualpuiah chuan a sang ber an ni a. India chuan point 1,079.99 an hmu a, a hma aia hmun thuma hniamah an tla a, 141-naah an awm.
FIFA RANKING TOP 10 & POINT:
- Spain 2004.48
- Argentina 1966.13
- France 1950.82
- England 1938.9
- Morocco 1809.37
- Portugal 1801.28
- Brazil 1800.91
- Belgium 1790.37
- Netherlands 1774.06
10 Colombia 1735.9