Coronavirus-a a chi pakhat, Omicron atanga insiam danglam, subvariant an tihte chu thla rei vak lo chhung an la leng thei a, Delta emaw, a chi dang emaw pawh nipuiah hian a leng leh chiam thei bawk niin Israel-a zirchianna (modelling study) neihah hmuh a ni.
Kar hmasaa Science of the Total Environment chanchinbua an thil hmuh an ziahah chuan Delta variant khan a hmaa hri chi dang lo awm tawhte a luahlan vek a, Omicron erawh chuan he hri hlauhawm tak hi luahlan ve zo lovin a irh chhuak leh thei tih a ni.
Ben-Gurion University of the Negev (BGU)-a zir chiangtute chuan variant thar awm zel hian coronavirus hi khawi laiah pawh a la awm reng tih a chian thu an sawi a, PCR leh rapid test hmanga hmuh tlem deuh tawh mah se a la tawp lo niin an sawi.
December, 2021 leh January, 2022 inkara Beer-Sheva khawpui thli an zirnaah Omicron leh Delta variant-te hi an inbei tawk hle niin an hmu.
Zir chiangtute hian model an siamah Omicron hi amah leh amah a inei ral dawn niin an ngai a, Delta erawh hun kal zelah a insiam muk zel dawn niin an ngai thung.
“Chiang taka lang ta chu, a chhan hrang hrang a awm thei ngei ang a; mahse, kan model siama a lan dan chuan Delta emaw, variant dang emaw hi tun nipuiah hian a darh leh ang tih a ni,” tiin BGU-a an professor, Ariel Kushmaro chuan an thuchhuahah a tar lang.
Tun thlenga an hmuh danah chuan variant thar a lo chhuah apiangin a hmaa lo awm tawh kha a hun reilo te chhungin a luahlan vek zel niin zirtute hian an hmu.
Hetih lai hian Delta variant ve thung erawh chu Omicron variant a tam lai khan tawm ve deuh mah se tuichhe paih an zirnaah a lo lang chhuak leh ang a, Omicron hi a luahlan leh thei niin an sawi.
“Model kan dina a lan dan chuan Omicron hi a tlem telh telh ang a, a ral mai dawn a; Delta variant erawh a insem darh ngai angin a insem darh zel dawn,” tiin zir chianna an thil hmuh ziaktute chuan an tar lang.