Mahni chhia leh tha hriatna hmanga vote thlak i thiam zel ang u
Mara Autonomous District Council (MADC) inthlan vote thlak ni a lo ni leh ta reng mai. MADC huamchhunga miten an chhia leh tha hriatna hmanga uluk taka vote an thlak theih ngei nan duhsakna kan hlan e.
Campaign hun tawp ni thlengin MADC inthlanna atana campaign boruak a lum tha niin a lang a, political party hrang hrangte pawhin an rawng huai an ser nasa hle bawk. Mi chal lang leh party a mi lawk tak tak an tleh phei a, a thla fe va chamchilhte pawh an awm hial.
Political party hrang hrangte an tan miau avang hian inbeihna leh dik tawk lo nia inhriattawnna pawh a nasa a, election dan bawhchhia nia insawina pawh a nasa hle. Siaha district election office chuan election model code of conduct bawhchhiah nia ngaih report pathum an dawn thu an sawi a, chungte chu chinfel tawh a nih thu an sawi nghal thei bawk. Dawn chiah lem loh pawh tlangkam titi thlengin a nasa hle nia hriat a ni bawk.
Mizoram hi inthlan thiam tak nia sawi kan ni thin a, MPF te dingin, kohhran leh tlawmngai pawlten inthlanna ralmuang a awm theih nan theihtawp chhuahin hna an thawk a, hengte hi state dangte neih ve loh leh min fakna pawh a ni thin. Tun tum inthlanah pawh hian inbeihna nasa tak karah inthlanna ralmuang tak a awm ngei a beiseiawm a, mipui lamte pawhin mahni vote hralh mai lovin, mahni chhia leh tha hriatna hmanga an mi duhzawng tak an vote mai kan beiseipui bawk e.