Chelsea in an tlarhnung thuam thatna tur player an melh mek a, tunhnaiah Antonio Rudiger leh Andreas Christensen ten club an chhuahsan dawn nia a lan avangin RB Leipzig defender Josko Gvardiol chu an ngaihven uluk.
Kum 20 mi defender hi vei khawr niin tlarhnung a defender pathum hmang tan veilam sirah defender rintlak tak a ni a. Kum naupang mahse goal ven mai bakah ball sem a thiam tel avangin fak a hlawh.
Croatian international defender hian tun season-ah Red Bull Arena-ah a season puitling hmasa ber a hmang a, a chetthat avangin ngaihven a hlawh nghal.
Hetihlai hian ani chauh hi Blues in an ngaihven a ni lova, hetihrual hian club neitu thar an awm hma chu engtinnge squad thuam that a nih dan tur sawi theih a la ni lo.
Chelsea hi tunhnaiah Sevilla defender Jules Kounde, Paris Saint-Germain defender Presnel Kimpembe leh Atletico Madrid defender Jose Giminez te nen sawizawm an lo ni tawh thin.
Thomas Tuchel chuan defender thar pahnih a duh dawn nia sawi a awm bawk avangin an player loan a chhuak zingah Levi Colwill, Ethan Ampadu leh Dujon Sterling te zing ami tan season tharah first team hmun a awm dawn niin an sawi tel.
Blues hian midfielder thar an melh bawk a, mahse an mi duh lalut tur chuan midfielder an neihsa an chhuahtir hmasak a ngai ang.