Asian Football Confederation hnuaia football coach ni thei tura inzirna C-Diploma Coaching Course thawhhnihna chu Thawhlehni khan Regional Sports Center, Saidan, Kolasib ah an nei zo.
He course hi ni nga chhung kalpui niin Mizo football coach 19 ten practical leh theory-ah exam an nei a. All India Football Federation atang instructor Mariano Diaz-a kaihhruaina hnuaiah thawh khatna leh thawh hnihna neih a ni a. Mizo football coach D-License nei mekten C-License nei turin result an nghak mek.
Course Instructor Mariano Diaz chuan infiammite hmasawnna atana State Football Association leh sorkar an thawk dun chu ropui a tihzia leh state dangte tan pawh entawntlak a tih thu a sawi a. “ISL a khel phak Mizo thalai thahnem tak an awm hian Mizoram chu football player leh coach tha tak tak chher chhuahna hmun a ni tih a lantir chiang hle a ni.” a ti.
C-diploma coaching course kharnaah hian Mizoram Youth Commission Under Secretary H. Lalnunzuala chuan Aizawl chauh ni lo, district hrang hrang atanga Football coach ten thiamna nei tura course an luhchilh chu lawmawm a tih thu leh a rah chhuah, Mizo naupang leh thalai footballer tha tak tak an chhuah phah ngei a beisei thu a sawi.
AFC C-Diploma Coaching Course hi nikum December thla khan Saidan a Sports Centre ah hian a thawh khatna huaihawt a lo ni tawh a. Mizo football coach 24 te training pek an ni.
Tun tumah hian Mizo coach 19 bakah state pawn atangin coach pathum an rawn tel thar bawk.